ਚੰਡੀਗੜ੍ਹ- ਦੇਸ਼ ਭਰ ਦੇ ਮੋਬਾਈਲ ਫੋਨਾਂ ‘ਤੇ ਅੱਜ ਆਇਆ ਐਮਰਜੈਂਸੀ ਅਲਰਟ ਇੱਕ ਦੇਸ਼ ਵਿਆਪੀ ਟੈਸਟ ਦਾ ਹਿੱਸਾ ਸੀ, ਕੋਈ ਅਸਲ ਖ਼ਤਰਾ ਨਹੀਂ। ਕੇਂਦਰ ਸਰਕਾਰ ਨੇ ਇਸ ਅਭਿਆਸ ਰਾਹੀਂ ਆਪਣੇ ਸਵਦੇਸ਼ੀ ‘ਸੈੱਲ ਬਰੌਡਕਾਸਟ’ ਚੇਤਾਵਨੀ ਸਿਸਟਮ ਦੀ ਸ਼ੁਰੂਆਤ ਕੀਤੀ ਹੈ, ਜੋ ਆਫ਼ਤਾਂ ਦੌਰਾਨ ਤੁਰੰਤ ਜਾਣਕਾਰੀ ਦੇਣ ਲਈ ਬਣਾਇਆ ਗਿਆ ਹੈ। ਇਸ ਪਲੇਟਫਾਰਮ ਦਾ ਨਾਮ ‘ਸਚੇਤ’ (SACHET)\B ਹੈ, ਜਿਸ ਨੂੰ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਅਤੇ ਸੰਚਾਰ ਮੰਤਰੀ ਜਯੋਤੀਰਾਦਿੱਤਿਆ ਸਿੰਧੀਆ ਨੇ ਲਾਂਚ ਕੀਤਾ ਹੈ। ਟੈਸਟ ਦੌਰਾਨ ਲੋਕਾਂ ਨੂੰ “Extremely Severe Alert” ਦਾ ਨੋਟੀਫਿਕੇਸ਼ਨ ਮਿਲਿਆ, ਜਿਸ ਵਿੱਚ ਸਾਫ਼ ਲਿਖਿਆ ਸੀ ਕਿ ਇਹ ਸਿਰਫ਼ ਇੱਕ ਟੈਸਟ ਹੈ। ਇਸ ਨਵੀਂ ਤਕਨੀਕ ਦੀ ਖਾਸ ਗੱਲ ਇਹ ਹੈ ਕਿ ਇਹ ਮੈਸੇਜ ਸਿੱਧਾ ਫੋਨ ਦੀ ਸਕਰੀਨ ‘ਤੇ ਦਿਖਾਈ ਦਿੰਦਾ ਹੈ, ਭਾਵੇਂ ਫੋਨ ਸਾਈਲੈਂਟ ਜਾਂ ‘ਡੂ ਨੋਟ ਡਿਸਟਰਬ’ ਮੋਡ ‘ਤੇ ਹੋਵੇ। ਇਹ ਇੱਕ ਖਾਸ ਅਲਾਰਮ ਟੋਨ ਨਾਲ ਆਉਂਦਾ ਹੈ ਤਾਂ ਜੋ ਤੁਰੰਤ ਧਿਆਨ ਖਿੱਚਿਆ ਜਾ ਸਕੇ।
ਅਧਿਕਾਰੀਆਂ ਅਨੁਸਾਰ, ਇਸ ਸਿਸਟਮ ਦੀ ਵਰਤੋਂ ਭੂਚਾਲ, ਸੁਨਾਮੀ, ਬਿਜਲੀ ਡਿੱਗਣ ਵਰਗੀਆਂ ਕੁਦਰਤੀ ਆਫ਼ਤਾਂ ਅਤੇ ਗੈਸ ਲੀਕ ਵਰਗੀਆਂ ਮਨੁੱਖੀ ਗਲਤੀਆਂ ਕਾਰਨ ਹੋਣ ਵਾਲੀਆਂ ਐਮਰਜੈਂਸੀਜ਼ ਬਾਰੇ ਚੇਤਾਵਨੀ ਦੇਣ ਲਈ ਕੀਤੀ ਜਾਵੇਗੀ। ਇਹ ਸਿਸਟਮ ਪੁਰਾਣੇ SMS ਸਿਸਟਮ ਨਾਲੋਂ ਤੇਜ਼ ਹੈ ਅਤੇ ਨੈੱਟਵਰਕ ਜਾਮ ਹੋਣ ਦੀ ਸਥਿਤੀ ਵਿੱਚ ਵੀ ਕੰਮ ਕਰ ਸਕਦਾ ਹੈ। ਇਸ ਨਾਲ ਦੇਸ਼ ਦੀ ਆਫ਼ਤ ਪ੍ਰਬੰਧਨ ਸਮਰੱਥਾ ਵਿੱਚ ਵੱਡਾ ਸੁਧਾਰ ਹੋਵੇਗਾ।