ਵਾਸ਼ਿੰਗਟਨ: ਅਮਰੀਕਾ ਦੀ ਇੱਕ ਖੋਜ ‘ਚ ਕਿਹਾ ਗਿਆ ਹੈ ਕਿ ਕੋਰੋਨਾ ਵੈਕਸੀਨ ਮੋਟੇ ਲੋਕਾਂ ‘ਤੇ ਬੇਅਸਰ ਹੋ ਸਕਦੀ ਹੈ। ਕੋਵਿਡ-19 ਦੀ ਜਟਿਲਤਾ ਹਾਈ ਬਾਡੀ ਮਾਸ ਇੰਡੈਕਸ (ਬੀਐਮਆਈ) ਵਾਲੇ ਲੋਕਾਂ ਦੀ ਸਥਿਤੀ ਨੂੰ ਖਰਾਬ ਕਰਦੀ ਹੈ। ਮਾਹਰਾਂ ਨੇ ਕੋਰੋਨਾਵਾਇਰਸ ਨਾਲ ਸੰਕਰਮਿਤ 812 ਮਰੀਜ਼ਾਂ ਦੇ ਬੀਐਮਆਈ ਦਾ ਅਧਿਐਨ ਕੀਤਾ। ਇਹ ਕੋਰੋਨਾ ਮਰੀਜ਼ ਜਾਂ ਤਾਂ ਬਿਮਾਰੀ ਤੋਂ ਠੀਕ ਹੋ ਗਏ ਜਾਂ ਫਿਰ ਵੀ ਲਾਗ ਨਾਲ ਲੜ ਰਹੇ ਸੀ।
ਖੋਜ ‘ਚ ਪਾਇਆ ਕਿ 812 ਵਿਅਕਤੀਆਂ ‘ਚੋਂ 70 ਪ੍ਰਤੀਸ਼ਤ ਮੋਟੇ ਸੀ ਜਦਕਿ ਕੋਵਿਡ-19 ਦੇ ਕਾਰਨ ਮਰਨ ਵਾਲਿਆਂ ਵਿੱਚੋਂ 82 ਪ੍ਰਤੀਸ਼ਤ ਜ਼ਿਆਦਾ ਭਾਰ ਵਾਲੇ ਸੀ। ਖੋਜਕਰਤਾ ਰਿਪੋਰਟ ਕਰਦੇ ਹਨ ਕਿ ਮੋਟੇ ਲੋਕ ਕੋਰੋਨਾਵਾਇਰਸ ਲਈ ਵਧੇਰੇ ਸੰਵੇਦਨਸ਼ੀਲ ਸਾਬਤ ਹੋਏ। ਉਨ੍ਹਾਂ ਅੱਗੇ ਦੱਸਿਆ ਕਿ ਮੋਟਾਪਾ ਸਰੀਰ ਦੇ ਪ੍ਰਤੀਰੋਧੀ ਪ੍ਰਤੀਕ੍ਰਿਆ ਨੂੰ ਕਮਜ਼ੋਰ ਕਰਦਾ ਹੈ ਤੇ ਸੋਜਸ਼ ਨੂੰ ਗੰਭੀਰ ਬਣਾਉਂਦਾ ਹੈ। ਇਸ ਕਾਰਨ ਕੋਰੋਨਾਵਾਇਰਸ ਨਾਲ ਲੜਨ ‘ਚ ਸਰੀਰ ਕਮਜ਼ੋਰ ਹੋ ਜਾਂਦਾ ਹੈ।
ਅਲਾਬਮਾ ਯੂਨੀਵਰਸਿਟੀ ਦੇ ਸਹਾਇਕ ਪ੍ਰੋਫੈਸਰ ਡਾ. ਚਡ ਪੇਟਿਟ ਦਾ ਕਹਿਣਾ ਹੈ, “ਸਵਾਲ ਇਹ ਨਹੀਂ ਕਿ ਵੈਕਸੀਨ ਵਾਇਰਸ ਤੋਂ ਬਚਾਏਗੀ ਜਾਂ ਨਹੀਂ, ਪਰ ਸਵਾਲ ਇਸ ਬਾਰੇ ਹੈ ਕਿ ਵੈਕਸੀਨ ਪ੍ਰਭਾਵਸ਼ਾਲੀ ਹੈ ਜਾਂ ਨਹੀਂ। ਸਰਲ ਸ਼ਬਦਾਂ ‘ਚ ਵੈਕਸੀਨ ਕੰਮ ਕਰ ਸਕਦੀ ਹੈ, ਪਰ ਜ਼ਰੂਰੀ ਨਹੀਂ ਕਿ ਹਰ ਇੱਕ ਲਈ ਇੱਕੋ ਜਿਹੀ ਸਾਬਤ ਹੋਵੇ।” ਸੈਂਟਰ ਫਾਰ ਡਿਜ਼ੀਜ਼ ਕੰਟਰੋਲ ਦੀ ਰਿਪੋਰਟ ‘ਚ ਕਿਹਾ ਗਿਆ ਹੈ ਕਿ ਮੋਟਾਪੇ ਨਾਲ ਜੁੜੀ ਸਮੱਸਿਆ ਕੋਵਿਡ-19 ਦੇ ਪ੍ਰਭਾਵਾਂ ਨੂੰ ਖਤਮ ਕਰ ਸਕਦੀ ਹੈ।
