ਦੁਬਈ- ਅਮਰੀਕੀ ਫ਼ੌਜ ਦਾ ਇੱਕ ਅਪਾਚੇ ਹਮਲਾਵਰ (attack) ਹੈਲੀਕਾਪਟਰ ਹੋਰਮੁਜ਼ ਜਲਮਾਰਗ ਦੇ ਨੇੜੇ ਹਾਦਸਾਗ੍ਰਸਤ ਹੋ ਗਿਆ। ਹਾਲਾਂਕਿ ਹੈਲੀਕਾਪਟਰ ‘ਤੇ ਮੌਜੂਦ ਚਾਲਕ ਦਲ ਦੇ ਦੋਵੇਂ ਮੈਂਬਰ “ਠੀਕ” ਹਨ, ਜਿਸ ਦੀ ਪੁਸ਼ਟੀ ਖੁਦ ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਕੀਤੀ ਹੈ। ਇਹ ਤੰਗ ਸਮੁੰਦਰੀ ਰਸਤਾ ਅਜੇ ਵੀ ਇਰਾਨ ਦੇ ਸਖ਼ਤ ਕੰਟਰੋਲ ਹੇਠ ਹੈ।
ਮੱਧ ਪੂਰਬ ਵਿੱਚ ਮੰਗਲਵਾਰ ਸਵੇਰ ਤੱਕ ਇਹ ਸਾਫ਼ ਨਹੀਂ ਹੋ ਸਕਿਆ ਸੀ ਕਿ ਇਹ ਹਾਦਸਾ ਕਿਸ ਕਾਰਨ ਹੋਇਆ। ਪੂਰਾ ਮੱਧ ਪੂਰਬ ਇੱਕ ਦਿਨ ਪਹਿਲਾਂ ਇਰਾਨ ਅਤੇ ਇਜ਼ਰਾਈਲ ਵਿਚਾਲੇ ਹੋਏ ਟਕਰਾਅ ਕਾਰਨ ਅਜੇ ਵੀ ਸਦਮੇ ਵਿੱਚ ਸੀ, ਜੋ ਕਿ ਇਰਾਨ ਜੰਗ ਦੌਰਾਨ ਚੱਲ ਰਹੀ ਕਮਜ਼ੋਰ ਜੰਗਬੰਦੀ ਲਈ ਹੁਣ ਤੱਕ ਦਾ ਸਭ ਤੋਂ ਵੱਡਾ ਝਟਕਾ ਸੀ। ਦੂਜੇ ਪਾਸੇ, ਇਰਾਨੀ ਸਰਕਾਰੀ ਮੀਡੀਆ ਨੇ ਵਿਦੇਸ਼ੀ ਰਿਪੋਰਟਾਂ ਦੇ ਹਵਾਲੇ ਨਾਲ ਇਸ ਹਾਦਸੇ ਦੀ ਗੱਲ ਤਾਂ ਮੰਨੀ ਹੈ, ਪਰ ਇਸ ਬਾਰੇ ਕੋਈ ਵੀ ਵਿਸਥਾਰਪੂਰਵਕ ਜਾਣਕਾਰੀ ਨਹੀਂ ਦਿੱਤੀ। ਉੱਥੇ ਹੀ ਰਾਸ਼ਟਰਪਤੀ ਟਰੰਪ ਨੇ ਸੋਮਵਾਰ ਰਾਤ ਨੂੰ ਐੱਨ ਬੀ ਏ (NBA) ਫਾਈਨਲ ਦੇਖਣ ਤੋਂ ਬਾਅਦ ਨਿਊਯਾਰਕ ਦੇ ਜੌਨ ਐਫ ਕੇਨੇਡੀ ਕੌਮਾਂਤਰੀ ਏਅਰਪੋਰਟ ‘ਤੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦੇ ਹੋਏ ਇਸ ਹਾਦਸੇ ਦੀ ਗੱਲ ਸਵੀਕਾਰ ਕੀਤੀ।
ਟਰੰਪ ਨੇ ਕਿਹਾ, “ਹਾਂ, ਪਾਇਲਟ ਬਿਲਕੁਲ ਠੀਕ ਹਨ। ਕੋਈ ਵੀ ਜ਼ਖ਼ਮੀ ਨਹੀਂ ਹੋਇਆ ਹੈ। ਅਸੀਂ ਕੱਲ੍ਹ ਇਸ ਸਬੰਧੀ ਇੱਕ ਰਿਪੋਰਟ ਜਾਰੀ ਕਰਨ ਜਾ ਰਹੇ ਹਾਂ, ਪਰ ਪਾਇਲਟ ਸੁਰੱਖਿਅਤ ਹਨ।” ‘ਦਿ ਨਿਊਯਾਰਕ ਟਾਈਮਜ਼’ ਦੀ ਰਿਪੋਰਟ ਮੁਤਾਬਕ, ਅਮਰੀਕੀ ਫ਼ੌਜ ਦਾ ਇੱਕ ਅਪਾਚੇ ਹਮਲਾਵਰ ਹੈਲੀਕਾਪਟਰ ਅਸਪਸ਼ਟ ਹਾਲਾਤਾਂ ਵਿੱਚ ਇਸ ਸਮੁੰਦਰੀ ਰਸਤੇ ਨੇੜੇ ਹੇਠਾਂ ਡਿੱਗ ਗਿਆ। ਇਸ ਹਾਦਸੇ ਬਾਰੇ ਜਦੋਂ ‘ਐਸੋਸੀਏਟਡ ਪ੍ਰੈਸ’ (AP) ਨੇ ਪ੍ਰਤੀਕਿਰਿਆ ਮੰਗੀ, ਤਾਂ ਅਮਰੀਕੀ ਫ਼ੌਜ ਦੀ ਸੈਂਟਰਲ ਕਮਾਂਡ ਅਤੇ ਰੱਖਿਆ ਵਿਭਾਗ ਵੱਲੋਂ ਤੁਰੰਤ ਕੋਈ ਜਵਾਬ ਨਹੀਂ ਦਿੱਤਾ ਗਿਆ।