ਨਵੀਂ ਦਿੱਲੀ- ਕ੍ਰਿਕਟਰ ਤੋਂ ਸਿਆਸਤਦਾਨ ਬਣੇ ਹਰਭਜਨ ਸਿੰਘ ਨੇ ਦੱਸਿਆ ਹੈ ਕਿ ‘ਆਪ’ (AAP) ਛੱਡ ਕੇ ਭਾਜਪਾ (BJP) ਵਿੱਚ ਸ਼ਾਮਲ ਹੋਣ ਦਾ ਫ਼ੈਸਲਾ ਉਨ੍ਹਾਂ ਵੱਲੋਂ ਇਸ ਲਈ ਲਿਆ ਗਿਆ ਕਿਉਂਕਿ ਉਨ੍ਹਾਂ ਨੂੰ ਆਪਣੀ ਪੁਰਾਣੀ ਪਾਰਟੀ ਵਿੱਚ ਆਪਣੀ ਗੱਲ ਨਾ ਸੁਣੇ ਜਾਣ ਤੋਂ ਨਿਰਾਸ਼ਾ ਹੋਈ ਸੀ। ਖਬਰ ਏਜੰਸੀ ਪੀ ਟੀ ਆਈ ਦੇ ਮੁੱਖ ਦਫ਼ਤਰ ਵਿਖੇ ਇੱਕ ਪੋਡਕਾਸਟ ਇੰਟਰਵਿਊ ਵਿੱਚ, 46 ਸਾਲਾ ਆਫ-ਸਪਿੰਨ ਦਿੱਗਜ ਨੇ ਇਸ ਕਦਮ ਤੋਂ ਬਾਅਦ ਜਲੰਧਰ ਵਿੱਚ ਉਨ੍ਹਾਂ ਦੇ ਘਰ ਦੇ ਬਾਹਰ ਹੋਏ ਪ੍ਰਦਰਸ਼ਨਾਂ ਬਾਰੇ ਵੀ ਗੱਲ ਕੀਤੀ।
ਹਰਭਜਨ ਨੂੰ 2022 ਵਿੱਚ ‘ਆਪ’ ਵੱਲੋਂ ਰਾਜ ਸਭਾ ਵਿੱਚ ਭੇਜਿਆ ਗਿਆ ਸੀ, ਪਰ ਉਹ, ਪਾਰਟੀ ਦੇ ਛੇ ਹੋਰ ਮੈਂਬਰਾਂ ਦੇ ਨਾਲ, ਇਸ ਸਾਲ ਅਪਰੈਲ ਵਿੱਚ ਭਾਜਪਾ ‘ਚ ਸ਼ਾਮਲ ਹੋ ਗਏ ਸਨ। ਉਨ੍ਹਾਂ ਨੇ ਯਾਦ ਕਰਦਿਆਂ ਕਿਹਾ, “ਜਦੋਂ (ਪੰਜਾਬ ਦੇ ਮੌਜੂਦਾ ਮੁੱਖ ਮੰਤਰੀ) ਭਗਵੰਤ ਮਾਨ ਨੇ ਮੈਨੂੰ ‘ਆਪ’ (AAP) ਵਿੱਚ ਸ਼ਾਮਲ ਹੋਣ ਲਈ ਕਿਹਾ, ਤਾਂ ਇਸ ਦਾ ਮਕਸਦ ਰਾਜ ਸਭਾ ਵਿੱਚ ਪਾਰਟੀ ਦੀ ਨੁਮਾਇੰਦਗੀ ਕਰਨਾ ਅਤੇ ਖੇਡਾਂ ਨਾਲ ਜੁੜੇ ਮੁੱਦਿਆਂ ਨੂੰ ਉਠਾਉਣਾ ਸੀ। ਮੈਂ ਉਸੇ ਸਮੇਂ ਸਾਫ਼ ਕਰ ਦਿੱਤਾ ਸੀ ਕਿ ਮੈਂ ਸਿਰਫ਼ ਖੇਡਾਂ ਬਾਰੇ ਹੀ ਗੱਲ ਕਰਾਂਗਾ ਅਤੇ ਰਾਜਨੀਤੀ ‘ਤੇ ਚਰਚਾ ਨਹੀਂ ਕਰਾਂਗਾ, ਕਿਉਂਕਿ ਇਹ ਮਰਾ ਕੰਮ ਨਹੀਂ ਹੈ।”
ਉਨ੍ਹਾਂ ਦੱਸਿਆ, “ਮੇਰੇ ਆਪ (AAP) ਵਿੱਚ ਸ਼ਾਮਲ ਹੋਣ ਦਾ ਸਿਰਫ਼ ਇਹੀ ਕਾਰਨ ਸੀ ਕਿ ਪਾਰਟੀ ਮੈਨੂੰ ਸਿਰਫ਼ ਪੰਜਾਬ ਵਿੱਚ ਹੀ ਨਹੀਂ ਸਗੋਂ ਕੌਮੀ ਪੱਧਰ ‘ਤੇ ਵੀ ਖੇਡਾਂ ਨੂੰ ਹੁਲਾਰਾ ਦੇਣ ਦਾ ਮੌਕਾ ਦੇ ਰਹੀ ਸੀ। ਪਰ ਜਦੋਂ ਮੈਂ ਆਪਣੇ ਵਿਚਾਰ ਪੇਸ਼ ਕਰਨ ਦੀ ਕੋਸ਼ਿਸ਼ ਕੀਤੀ, ਤਾਂ ਪਾਰਟੀ ਵਿੱਚ ਮੈਨੂੰ ਸੁਣਿਆ ਨਹੀਂ ਗਿਆ। ਮੇਰੇ ਵਿਚਾਰ ਸਿਰਫ਼ ਵਿਚਾਰ ਹੀ ਬਣ ਕੇ ਰਹਿ ਗਏ।” ਹਰਭਜਨ ਨੇ ਕਿਹਾ ਕਿ ਆਪਣੀ ਸੋਚ ਨੂੰ ਪਾਰਟੀ ਅੱਗੇ ਪੇਸ਼ ਕਰਨ ਦੀ ਭਾਰੀ ਕੋਸ਼ਿਸ਼ ਕਰਨ ਦੇ ਬਾਵਜੂਦ ਅਣਡਿੱਠ ਕੀਤੇ ਜਾਣ ਕਾਰਨ ਉਹ ਆਖ਼ਰਕਾਰ ਅੱਕ ਗਏ ਸਨ।
ਉਨ੍ਹਾਂ ਕਿਹਾ, “…ਜਿਸ ਕੰਮ ਲਈ ਮੈਂ ਆਪ (AAP) ਵਿੱਚ ਸ਼ਾਮਲ ਹੋਇਆ ਸੀ, ਉਹ ਪੂਰਾ ਨਹੀਂ ਹੋ ਰਿਹਾ ਸੀ। ਜੇਕਰ ਮੇਰੇ ਵੱਲੋਂ ਸੁਝਾਈ ਗਈ ਦਿਸ਼ਾ ਵਿੱਚ ਇੱਕ ਛੋਟਾ ਜਿਹਾ ਕਦਮ ਵੀ ਚੁੱਕਿਆ ਜਾਂਦਾ, ਤਾਂ ਮੈਂ ਨਾ ਛੱਡਦਾ। ਪਰ ਮੇਰੇ ਪਾਰਟੀ ਵਿੱਚ ਸ਼ਾਮਲ ਹੋਣ ਦਾ ਅਸਲ ਕਾਰਨ ਹੀ ਪੂਰਾ ਨਹੀਂ ਹੋ ਰਿਹਾ ਸੀ। ਇਸੇ ਕਰਕੇ ਮੈਂ ਛੱਡ ਦਿੱਤੀ ਕਿਉਂਕਿ ਕੋਈ ਵੀ ਮੇਰੇ ਸੁਝਾਵਾਂ ਦਾ ਜਵਾਬ ਨਹੀਂ ਦੇ ਰਿਹਾ ਸੀ।” ਉੱਥੇ ਹੀ ‘ਆਪ’ (AAP) ਨੇ ਇਸ ਝਟਕੇ ‘ਤੇ ਤਿੱਖੀ ਪ੍ਰਤੀਕਿਰਿਆ ਦਿੰਦਿਆਂ ਪਾਰਟੀ ਛੱਡ ਕੇ ਗਏ ਸੰਸਦ ਮੈਂਬਰਾਂ ਉੱਤੇ ਧੋਖਾ ਦੇਣ ਦਾ ਦੋਸ਼ ਲਾਇਆ ਸੀ। ਹਰਭਜਨ ਦੇ ਘਰ ਦੇ ਬਾਹਰ ਵਿਰੋਧ ਪ੍ਰਦਰਸ਼ਨ ਹੋਏ ਅਤੇ ਉਨ੍ਹਾਂ ਦਾ ਪੁਤਲਾ ਵੀ ਸਾੜਿਆ ਗਿਆ। ਇਸ ਘਟਨਾ ਬਾਰੇ ਪੁੱਛੇ ਜਾਣ ‘ਤੇ ਹਰਭਜਨ ਨੇ ਕਿਹਾ ਕਿ ਉਹ ਕਿਸੇ ਦਾ ਨਾਮ ਨਹੀਂ ਲੈਣਾ ਚਾਹੁਣਗੇ, ਕਿਉਂਕਿ ਇਹ ਸਮਝਣਾ ਆਸਾਨ ਹੈ ਕਿ ਪ੍ਰਦਰਸ਼ਨਕਾਰੀ ਕੌਣ ਹੋ ਸਕਦੇ ਸਨ।
ਉਨ੍ਹਾਂ ਸਵਾਲ ਕੀਤਾ, “ਹਰ ਕੋਈ ਜਾਣਦਾ ਹੈ ਕਿ ਉਹ ਲੋਕ ਕੌਣ ਸਨ ਅਤੇ ਕਿੱਥੋਂ ਆਏ ਸਨ; ਮੈਨੂੰ ਕੁਝ ਵੀ ਕਹਿਣ ਦੀ ਲੋੜ ਨਹੀਂ ਹੈ। ਇਸ ਦੇਸ਼ ਦਾ ਆਮ ਆਦਮੀ ਮੈਨੂੰ ਮੇਰੇ ਕ੍ਰਿਕਟ ਦੀ ਵਜ੍ਹਾ ਕਰਕੇ ਜਾਣਦਾ ਹੈ ਅਤੇ ਉਸ ਨੇ ਮੈਨੂੰ ਬਹੁਤ ਪਿਆਰ ਦਿੱਤਾ ਹੈ; ਉਹ ਮੇਰਾ ਪੁਤਲਾ ਕਿਉਂ ਸਾੜਨਗੇ ਜਾਂ ਮੇਰੇ ਘਰ ਦੇ ਬਾਹਰ ‘ਗੱਦਾਰ’ ਕਿਉਂ ਲਿਖਣਗੇ? ਮੈਂ ਕਿਸ ਨਾਲ ਗੱਦਾਰੀ ਕੀਤੀ ਹੈ?” ਉਨ੍ਹਾਂ ਨੇ ਜ਼ੋਰ ਦੇ ਕੇ ਕਿਹਾ, “ਉਨ੍ਹਾਂ (ਆਪ) ਨੂੰ ਮੇਰਾ ਸਵਾਲ ਹੈ: ਪੰਜਾਬ ਦੇ ਲੋਕਾਂ ਨਾਲ ਕੀਤੇ ਉਨ੍ਹਾਂ ਦੇ ਵੱਡੇ-ਵੱਡੇ ਵਾਅਦਿਆਂ ਦਾ ਕੀ ਹੋਇਆ? ਤੁਸੀਂ ਪੰਜਾਬ ਲਈ ਕੀ ਕੀਤਾ? ਇੱਥੇ ਅਸਲ ਗੱਦਾਰ ਕੌਣ ਹੈ? ਅਤੇ ਕੀ ਤੁਸੀਂ ਮੈਨੂੰ ਪੁੱਛਿਆ ਕਿ ਮੈਂ ਜੋ ਕੀਤਾ, ਉਹ ਕਿਉਂ ਕੀਤਾ? ਸਿਰਫ਼ ਇਸ ਲਈ ਕਿ ਤੁਸੀਂ ਮੈਨੂੰ ਗੱਦਾਰ ਕਹਿੰਦੇ ਹੋ, ਮੈਂ ਗੱਦਾਰ ਨਹੀਂ ਬਣ ਜਾਂਦਾ। ਨਾ ਹੀ ਮੈਂ ਤੁਹਾਡੇ ਕਹਿਣ ਨਾਲ ਚੋਰ ਬਣਦਾ ਹਾਂ।”