ਚੰਡੀਗੜ੍ਹ- ਪੰਜਾਬ ’ਚ ਕਈ ਉਮੀਦਵਾਰ ਅਜਿਹੇ ਵੀ ਹਨ ਜਿਨ੍ਹਾਂ ਦੀ ਕੌਂਸਲਰੀ ‘ਕਿਸਮਤ ਪੁੜੀ’ ਵਿਚੋਂ ਨਿਕਲੀ ਹੈ। ਜਦੋਂ ਦੋ-ਦੋ ਉਮੀਦਵਾਰਾਂ ਨੂੰ ਇੱਕੋ ਜਿੰਨੀਆਂ ਵੋਟਾਂ ਹਾਸਲ ਹੋਈਆਂ ਤਾਂ ਹਾਰ ਜਿੱਤ ਦਾ ਫ਼ੈਸਲਾ ਪਰਚੀ ਪਾ ਕੇ ਕੀਤਾ ਗਿਆ। ਨਗਰ ਕੌਂਸਲ ਬੋਹਾ ਦੇ ਵਾਰਡ ਨੰਬਰ 10 ’ਚ ਸ਼੍ਰੋਮਣੀ ਅਕਾਲੀ ਦਲ ਦਾ ਉਮੀਦਵਾਰ ਗੁਰਮੀਤ ਸਿੰਘ ‘ਪਰਚੀ’ ਨਾਲ ਜਿੱਤਣ ’ਚ ਸਫਲ ਹੋਇਆ ਹੈ। ਉਸ ਦੇ ਮੁਕਾਬਲੇ ’ਚ ਆਜ਼ਾਦ ਉਮੀਦਵਾਰ ਪਰਦੀਪ ਕੁਮਾਰ ਬਿੱਟਾ ਸੀ। ਦੋਵੇਂ ਉਮੀਦਵਾਰਾਂ ਨੂੰ 256-256 ਵੋਟਾਂ ਹਾਸਲ ਹੋਈਆਂ।
ਉਮੀਦਵਾਰਾਂ ਦੀ ਸਹਿਮਤੀ ਨਾਲ ਚੋਣ ਪ੍ਰਸ਼ਾਸਨ ਨੇ ‘ਪਰਚੀ ’ ਪਾ ਕੇ ਹਾਰ ਜਿੱਤ ਦਾ ਫ਼ੈਸਲਾ ਕਰ ਦਿੱਤਾ। ਵੋਟਰਾਂ ਨੇ ਤਾਂ ਦੋਵੇਂ ਉਮੀਦਵਾਰਾਂ ਦਾ ਇੱਕੋ ਜਿੰਨਾ ਮਾਣ ਰੱਖਿਆ ਪਰ ਪਰਦੀਪ ਕੁਮਾਰ ਬਿੱਟਾ ਦੀ ਕਿਸਮਤ ਹਾਰ ਗਈ। ਰਾਜਪੁਰਾ ਦੇ ਵਾਰਡ ਨੰਬਰ 7 ’ਚੋਂ ਭਾਜਪਾ ਦੀ ਨੀਲਮ ਮਹਿਤਾ ਵੀ ਕਿਸਮਤ ਦੀ ਧਨੀ ਨਿਕਲੀ, ਜਿਸ ਨੂੰ ਪਰਚੀ ਸਿਸਟਮ ਨੇ ਜਿਤਾ ਦਿੱਤਾ। ਉਸ ਦੀ ਵਿਰੋਧੀ ‘ਆਪ’ ਉਮੀਦਵਾਰ ਚਾਰੂ ਚੌਧਰੀ ਸੀ।
ਜੋਗਾ ਪੰਚਾਇਤ ’ਚ ਕਮਿਊਨਿਸਟ ਸਮਰਥਕ ਸੁਖਜਿੰਦਰ ਕੌਰ ਦੀ ਕਿਸਮਤ ਜਾਗੀ- ਨਗਰ ਪੰਚਾਇਤ ਜੋਗਾ ਦੇ ਵਾਰਡ ਨੰਬਰ ਇੱਕ ’ਚੋਂ ਆਜ਼ਾਦ ਉਮੀਦਵਾਰ ਸੁਖਜਿੰਦਰ ਕੌਰ ਵੀ ‘ਪਰਚੀ ਸਿਸਟਮ’ ਨਾਲ ਹੀ ਚੋਣ ਜਿੱਤ ਗਈ। ਇਸ ਵਾਰਡ ’ਚ ਦੋਵੇਂ ਉਮੀਦਵਾਰਾਂ ਨੂੰ 141-141 ਵੋਟਾਂ ਮਿਲੀਆਂ। ਸੁਖਜਿੰਦਰ ਕੌਰ ਨੇ ‘ਬਾਲਟੀ’ ਚੋਣ ਨਿਸ਼ਾਨ ’ਤੇ ਚੋਣ ਲੜੀ ਪਰ ਉਹ ਕਮਿਊਨਿਸਟਾਂ ਵੱਲੋਂ ਉਮੀਦਵਾਰ ਸੀ। ਭਾਵੇਂ ਕਮਿਊਨਿਸਟ ਵਿਚਾਰਧਾਰਕ ਤੌਰ ’ਤੇ ਕਿਸਮਤ ਵਿੱਚ ਵਿਸ਼ਵਾਸ ਨਹੀਂ ਰੱਖਦੇ, ਪਰ ਪਰਚੀ ਨਿਕਲਣ ਨਾਲ ਸੁਖਜਿੰਦਰ ਕੌਰ ਦੀ ਕਿਸਮਤ ਚਮਕ ਗਈ ਅਤੇ ਉਹ ਕੌਂਸਲਰ ਬਣ ਗਈ। ਚੇਤੇ ਰਹੇ ਕਿ ਨਗਰ ਪੰਚਾਇਤ ਜੋਗਾ ’ਚ ਐਤਕੀਂ ਕਮਿਊਨਿਸਟ ਚੋਣ ਹਾਰ ਗਏ ਹਨ, ਜਦਕਿ ਉਨ੍ਹਾਂ ਦੇ ਵਿਰੋਧ ’ਚ ਬਣਿਆ ਸਾਂਝਾ ਮੋਰਚਾ ਬਾਜ਼ੀ ਮਾਰ ਗਿਆ ਹੈ।