ਮੁੰਬਈ: ਭਾਰਤੀ ਸਿਨੇਮਾ ਦੇ ਇਤਿਹਾਸ ਵਿੱਚ ਕੁਝ ਫ਼ਿਲਮਾਂ ਅਜਿਹੀਆਂ ਹੁੰਦੀਆਂ ਹਨ ਜੋ ਸਿਰਫ਼ ਮਨੋਰੰਜਨ ਹੀ ਨਹੀਂ ਕਰਦੀਆਂ, ਸਗੋਂ ਪੂਰੀ ਪੀੜ੍ਹੀ ਦੀ ਸੋਚ ਅਤੇ ਜੀਵਨ ਸ਼ੈਲੀ ਨੂੰ ਬਦਲ ਕੇ ਰੱਖ ਦਿੰਦੀਆਂ ਹਨ। ਸਾਲ 2001 ਵਿੱਚ ਰਿਲੀਜ਼ ਹੋਈ ਫ਼ਿਲਮ ‘ਦਿਲ ਚਾਹਤਾ ਹੈ’ ਆਪਣੀ ਰਿਲੀਜ਼ ਦੇ 25 ਸਾਲ ਪੂਰੇ ਕਰ ਚੁੱਕੀ ਹੈ। ਫ਼ਰਹਾਨ ਅਖ਼ਤਰ ਦੇ ਨਿਰਦੇਸ਼ਨ ਹੇਠ ਬਣੀ ਇਸ ਸੁਪਰਹਿੱਟ ਫ਼ਿਲਮ ਨੇ ਹਿੰਦੀ ਸਿਨੇਮਾ ਵਿੱਚ ਦੋਸਤੀ, ਪਿਆਰ ਅਤੇ ਨੌਜਵਾਨਾਂ ਦੇ ਰਿਸ਼ਤਿਆਂ ਨੂੰ ਦੇਖਣ ਦਾ ਇੱਕ ਬਿਲਕੁਲ ਨਵਾਂ ਅਤੇ ਆਧੁਨਿਕ ਨਜ਼ਰੀਆ ਪੇਸ਼ ਕੀਤਾ ਸੀ।
ਆਕਾਸ਼, ਸਮੀਰ ਅਤੇ ਸਿਧਾਰਥ ਦੇ ਕਿਰਦਾਰਾਂ ਰਾਹੀਂ ਆਮੀਰ ਖ਼ਾਨ, ਸੈਫ਼ ਅਲੀ ਖ਼ਾਨ ਅਤੇ ਅਕਸ਼ੈ ਖੰਨਾ ਦੀ ਤਿਕੜੀ ਨੇ ਪਰਦੇ ‘ਤੇ ਅਜਿਹਾ ਜਾਦੂ ਬਿਖੇਰਿਆ ਜੋ ਅੱਜ ਵੀ ਦਰਸ਼ਕਾਂ ਦੇ ਦਿਲਾਂ ਵਿੱਚ ਤਾਜ਼ਾ ਹੈ। ਇਸ ਫ਼ਿਲਮ ਤੋਂ ਪਹਿਲਾਂ ਭਾਰਤੀ ਸਿਨੇਮਾ ਵਿੱਚ ਦੋਸਤੀ ਨੂੰ ਅਕਸਰ ਬਹੁਤ ਜ਼ਿਆਦਾ ਡਰਾਮੇਬਾਜ਼ੀ ਅਤੇ ਰਵਾਇਤੀ ਢੰਗ ਨਾਲ ਦਿਖਾਇਆ ਜਾਂਦਾ ਸੀ, ਪਰ ‘ਦਿਲ ਚਾਹਤਾ ਹੈ’ ਨੇ ਅਸਲ ਜ਼ਿੰਦਗੀ ਦੇ ਸਹਿਜ ਸੰਵਾਦਾਂ, ਗੋਆ ਦੇ ਟ੍ਰਿਪ ਅਤੇ ਦੋਸਤਾਂ ਵਿਚਕਾਰ ਹੁੰਦੀਆਂ ਨੋਕ-ਝੋਕ ਨੂੰ ਬਹੁਤ ਹੀ ਖੂਬਸੂਰਤ ਤਰੀਕੇ ਨਾਲ ਦਿਖਾਇਆ।
ਫ਼ਿਲਮ ਦੇ ਸ਼ਾਨਦਾਰ ਸੰਗੀਤ, ਸ਼ੰਕਰ-ਏਹਸਾਨ-ਲੋਏ ਦੀਆਂ ਧੁਨਾਂ ਅਤੇ ਜਾਵੇਦ ਅਖ਼ਤਰ ਦੇ ਲਿਖੇ ਗੀਤਾਂ ਨੇ ਇਸ ਨੂੰ ਹੋਰ ਵੀ ਯਾਦਗਾਰ ਬਣਾ ਦਿੱਤਾ। 25 ਸਾਲ ਬੀਤ ਜਾਣ ਤੋਂ ਬਾਅਦ ਵੀ ਇਹ ਫ਼ਿਲਮ ਹਰ ਨਵੀਂ ਪੀੜ੍ਹੀ ਦੇ ਨੌਜਵਾਨਾਂ ਨੂੰ ਆਪਣੇ ਨਾਲ ਜੋੜਦੀ ਹੈ। ਅੱਜ ਵੀ ਜਦੋਂ ਦੋਸਤ ਗੋਆ ਜਾਣ ਦਾ ਪਲੈਨ ਬਣਾਉਂਦੇ ਹਨ ਜਾਂ ਆਪਣੀ ਦੋਸਤੀ ਦੇ ਸੁਹਾਣੇ ਪਲਾਂ ਨੂੰ ਯਾਦ ਕਰਦੇ ਹਨ, ਤਾਂ ‘ਦਿਲ ਚਾਹਤਾ ਹੈ’ ਦਾ ਜ਼ਿਕਰ ਸਭ ਤੋਂ ਪਹਿਲਾਂ ਆਉਂਦਾ ਹੈ।