ਪਿਛਲੇ ਦਿਨੀਂ ਚੌਪਾਲ ਐਪ ’ਤੇ ਰਿਲੀਜ਼ ਹੋਈ ਪੰਜਾਬੀ ਫਿਲਮ ‘ਰੋਡੇ ਕਾਲਜ’ ਕਾਫ਼ੀ ਚਰਚਾ ਵਿੱਚ ਹੈ। ਹੋਰਨਾਂ ਤੋਂ ਕੁਝ ਵੱਖਰੀ ਕਹਾਣੀ ਵਾਲੀ ਇਸ ਫਿਲਮ ਦਾ ਲੇਖਕ ਅਤੇ ਨਿਰਦੇਸ਼ਕ ਹੈਪੀ ਰੋਡੇ ਹੈ। ਇਸ ਦੀ ਸਟਾਰ ਕਾਸਟ ਵਿੱਚ ਮਾਨਵ ਵਿੱਜ ਅਤੇ ਯੋਗਰਾਜ ਸਿੰਘ ਤੋਂ ਇਲਾਵਾ ਥੀਏਟਰ ਨਾਲ ਜੁੜੇ ਵਿਸ਼ਾਲ ਬਰਾੜ, ਧਨਵੀਰ ਸਿੰਘ, ਮਨਪ੍ਰੀਤ ਡੌਲੀ, ਅਰਵਿੰਦਰ ਕੌਰ, ਰਾਹੁਲ ਜੇਟਲੀ, ਬਲਵਿੰਦਰ ਧਾਲੀਵਾਲ, ਕਵੀ ਸਿੰਘ ਅਤੇ ਰਾਜ ਜੋਧਾ ਵਰਗੇ ਪ੍ਰਤਿਭਾਵਾਨ ਨਵੇਂ ਚਿਹਰੇ ਵੀ ਸ਼ਾਮਲ ਹਨ। ਇਨ੍ਹਾਂ ਸਭਨਾਂ ਨੇ ਆਪਣੇ ਵੱਲੋਂ ਪੂਰੀ ਕਮਾਲ ਕੀਤੀ ਹੋਈ ਹੈ।
ਪੰਜਾਬ ਦੇ ਮਾਲਵਾ ਖੇਤਰ ਵਿੱਚ ਪੈਂਦੇ ਪੰਜਾਬ ਦੇ ਪੁਰਾਣੇ ਪੌਲੀਟੈਕਨਿਕ ਕਾਲਜਾਂ ਵਿੱਚੋਂ ਇੱਕ ਸਰਕਾਰੀ ਪੌਲੀਟੈਕਨਿਕ ਕਾਲਜ ਰੋਡੇ ਅਤੇ ਸਰਕਾਰੀ ਗੁਰੂ ਨਾਨਕ ਆਰਟਸ ਕਾਲਜ ਰੋਡੇ ਇਸ ਫਿਲਮ ਦੇ ਕੇਂਦਰ ਬਿੰਦੂ ਹਨ। ਫਿਲਮ ਦੀ ਕਹਾਣੀ ਵੀ ਇਨ੍ਹਾਂ ਕਾਲਜਾਂ ਦੇ ਵਿਦਿਆਰਥੀਆਂ ਨਾਲ ਸਬੰਧਿਤ ਹੈ ਅਤੇ ਬਹੁਤੀ ਸ਼ੂਟਿੰਗ ਵੀ ਇਨ੍ਹਾਂ ਕਾਲਜਾਂ ਵਿੱਚ ਹੀ ਹੋਈ ਹੈ। ਇੱਕ ਦੂਜੇ ਦੇ ਗੁਆਂਢੀ ਇਹ ਦੋਵੇਂ ਵਿੱਦਿਅਕ ਅਦਾਰੇ ਪੰਜਾਬ ਦੇ ਮੰਨੇ ਪ੍ਰਮੰਨੇ ਵਿੱਦਿਅਕ ਅਦਾਰੇ ਹਨ, ਜਿੱਥੋਂ ਪੜ੍ਹ ਕੇ ਜਾਣ ਵਾਲੇ ਵਿਦਿਆਰਥੀ ਉੱਚ ਅਹੁਦਿਆਂ ’ਤੇ ਬਿਰਾਜਮਾਨ ਹਨ।