ਚੰਡੀਗੜ੍ਹ- ਨਿਊਜ਼ੀਲੈਂਡ ਦੇ ਪਾਪਾਮੋਆ (Papamoa) ਵਿੱਚ ਉਬੇਰ (Uber) ਦੀ ਸ਼ਿਫਟ ਦੌਰਾਨ ਇੱਕ ਦਰਦਨਾਕ ਸੜਕ ਹਾਦਸੇ ਵਿੱਚ ਪੰਜਾਬ ਦੇ ਰਹਿਣ ਵਾਲੇ 36 ਸਾਲਾ ਭਾਰਤੀ ਮੂਲ ਦੇ ਵਿਅਕਤੀ ਰਮਨਦੀਪ ਢਿੱਲੋਂ ਦੀ ਮੌਤ ਹੋ ਗਈ। ਉਹ ਆਪਣੇ ਪਿੱਛੇ ਪਤਨੀ ਅਤੇ 18 ਮਹੀਨਿਆਂ ਦੀ ਧੀ ਛੱਡ ਗਿਆ ਹੈ। ਨਿਊਜ਼ੀਲੈਂਡ ਪੁਲੀਸ ਅਨੁਸਾਰ, ਬੀਤੇ ਬੁੱਧਵਾਰ ਦੀ ਸ਼ਾਮ ਬੈੱਲ ਰੋਡ ਅਤੇ ਪੋਪਲਰ ਲੇਨ ਦੇ ਵਿਚਕਾਰ ਤੇ ਪੁਕੇ ਹਾਈਵੇਅ (Te Puke Highway) ‘ਤੇ ਦੋ ਵਾਹਨਾਂ ਦੀ ਟੱਕਰ ਹੋ ਗਈ, ਜਿਸ ਵਿੱਚ ਰਮਨਦੀਪ ਢਿੱਲੋਂ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ, ਜਦਕਿ ਦੂਜੀ ਗੱਡੀ ਵਿੱਚ ਸਵਾਰ ਦੋ ਲੋਕ ਜ਼ਖ਼ਮੀ ਹੋ ਗਏ।
ਮੂਲ ਰੂਪ ਵਿੱਚ ਪੰਜਾਬ ਦਾ ਰਹਿਣ ਵਾਲਾ ਢਿੱਲੋਂ ਸਾਲ 2015 ਵਿੱਚ ਸਟੂਡੈਂਟ ਵੀਜ਼ੇ ‘ਤੇ ਨਿਊਜ਼ੀਲੈਂਡ ਗਿਆ ਸੀ। ਉਹ 2024 ਵਿੱਚ ਵੀਰਪਾਲ ਕੌਰ ਨਾਲ ਵਿਆਹ ਕਰਨ ਲਈ ਕੁਝ ਸਮੇਂ ਲਈ ਭਾਰਤ ਪਰਤਿਆ ਸੀ, ਜਿਸ ਤੋਂ ਬਾਅਦ ਇਹ ਜੋੜਾ ਪਾਪਾਮੋਆ ਵਿੱਚ ਇਕੱਠਾ ਰਹਿਣ ਲੱਗਾ, ਜਿੱਥੇ ਉਹ ਕੀਵੀਫਰੂਟ (kiwifruit) ਦੇ ਬਾਗਾਂ ਵਿੱਚ ਕੰਮ ਕਰਦਾ ਸੀ। ਆਪਣੀ ਬੇਟੀ ਕੁਦਰਤ ਦੇ ਜਨਮ ਤੋਂ ਬਾਅਦ, ਢਿੱਲੋਂ ਨੇ ਉਬੇਰ (Uber) ਚਲਾਉਣੀ ਸ਼ੁਰੂ ਕਰ ਦਿੱਤੀ ਸੀ ਤਾਂ ਜੋ ਉਨ੍ਹਾਂ ਨੂੰ ਕੰਮ ਵਿੱਚ ਥੋੜ੍ਹੀ ਖੁੱਲ੍ਹ ਮਿਲ ਸਕੇ ਅਤੇ ਉਹ ਬੱਚੀ ਦੀ ਦੇਖਭਾਲ ਵਿੱਚ ਮਦਦ ਕਰ ਸਕੇ।
ਵੀਰਪਾਲ ਕੌਰ ਨੇ ਸਥਾਨਕ ਮੀਡੀਆ ਨੂੰ ਦੱਸਿਆ ਕਿ ਜਿਸ ਸੜਕ ‘ਤੇ ਸ਼ਾਮ ਲਗਪਗ 7:15 ਵਜੇ ਇਹ ਹਾਦਸਾ ਹਇਆ, ਉਸ ਸੜਕ ‘ਤੇ ਉਨ੍ਹਾਂ ਦੇ ਪਤੀ ਅਕਸਰ ਗੱਡੀ ਚਲਾਉਂਦੇ ਸਨ। ਉਸ ਸ਼ਾਮ ਘਰੋਂ ਨਿਕਲਣ ਤੋਂ ਪਹਿਲਾਂ ਉਨ੍ਹਾਂ ਨੇ ਆਪਣੀ ਬੇਟੀ ਨਾਲ ਸਮਾਂ ਬਿਤਾਇਆ ਸੀ ਅਤੇ ਪਤਨੀ ਨੂੰ ਕਿਹਾ ਸੀ ਕਿ ਉਹ ਰਾਤ ਦੇ ਖਾਣੇ ਲਈ ਜਲਦੀ ਵਾਪਸ ਆ ਜਾਣਗੇ। ਜਦੋਂ ਉਨ੍ਹਾਂ ਨੇ ਫ਼ੋਨ ਚੁੱਕਣਾ ਬੰਦ ਕਰ ਦਿੱਤਾ ਤਾਂ ਚਿੰਤਾ ਵਧ ਗਈ। ਬਾਅਦ ਵਿੱਚ ਰਾਤ ਨੂੰ ਪੁਲੀਸ ਨੇ ਘਰ ਆ ਕੇ ਇਸ ਦੁਖਦਾਈ ਖ਼ਬਰ ਦੀ ਜਾਣਕਾਰੀ ਦਿੱਤੀ।
ਵੀਰਪਾਲ ਕੌਰ ਨੇ ‘ਨਿਊਜ਼ੀਲੈਂਡ ਹੈਰਾਲਡ’ ਨੂੰ ਦੱਸਿਆ, “ਮੈਂ ਬਹੁਤ ਰੋਈ, ਮੈਂ ਬਹੁਤ ਰੋਈ। ਮੈਨੂੰ ਲੱਗਿਆ ਕਿ ਮੇਰੀ ਜ਼ਿੰਦਗੀ ਹੁਣ ਬਰਬਾਦ ਹੋ ਗਈ ਹੈ।” ਉਨ੍ਹਾਂ ਨੇ ਢਿੱਲੋਂ ਨੂੰ “ਮਾਸੂਮ ਅਤੇ ਵਫ਼ਾਦਾਰ” ਦੱਸਿਆ ਅਤੇ ਕਿਹਾ ਕਿ ਉਹ ਪਿਤਾ ਬਣਨ ‘ਤੇ ਬਹੁਤ ਖੁਸ਼ ਸਨ। ਉਨ੍ਹਾਂ ਨੇ ਇਹ ਵੀ ਦੱਸਿਆ ਕਿ ਉਨ੍ਹਾਂ ਦੀ ਬੇਟੀ ਲਗਾਤਾਰ ਆਪਣੇ ਪਿਤਾ ਬਾਰੇ ਪੁੱਛਦੀ ਰਹਿੰਦੀ ਹੈ ਅਤੇ ਉਸ ਦਾ ਹਾਸਾ ਬਿਲਕੁਲ ਆਪਣੇ ਪਿਤਾ ਵਰਗਾ ਹੈ। 20 ਮਈ ਨੂੰ ਹੋਏ ਢਿੱਲੋਂ ਦੇ ਸੰਸਕਾਰ ਵਿੱਚ ਪੂਰੇ ਨਿਊਜ਼ੀਲੈਂਡ ਤੋਂ ਭਾਰਤੀ ਭਾਈਚਾਰੇ ਦੇ ਲੋਕ ਸ਼ਾਮਲ ਹੋਏ। ਪਰਿਵਾਰ ਦੀ ਮਦਦ, ਸਸਕਾਰ ਦੇ ਖਰਚਿਆਂ ਅਤੇ ਰੋਜ਼ਾਨਾ ਦੇ ਗੁਜ਼ਾਰੇ ਲਈ ਇੱਕ ਫੰਡ ਇਕੱਠਾ ਕਰਨ ਦੀ ਮੁਹਿੰਮ (fundraising campaign) ਵੀ ਸ਼ੁਰੂ ਕੀਤੀ ਗਈ ਹੈ।