ਦੇਸ਼ ਵਿਚ ਕੋਰੋਨਾ ਦੇ ਵਧਦੇ ਮਾਮਲਿਆਂ ਤੇ ਟੀਕਾਕਰਨ ਦੀ ਸਥਿਤੀ ਸਬੰਧੀ ਕੇਂਦਰੀ ਸਿਹਤ ਸਕੱਤਰ ਰਾਜੇਸ਼ ਭੂਸ਼ਣ ਨੇ ਕਿਹਾ ਕਿ ਦੇਸ਼ ਭਰ ਵਿਚ 10 ਜ਼ਿਲ੍ਹੇ ਹਨ ਜਿਨ੍ਹਾਂ ਵਿਚ ਸਭ ਤੋਂ ਵੱਧ ਸਰਗਰਮ ਮਾਮਲੇ ਹਨ- ਪੁਣੇ, ਮੁੰਬਈ, ਨਾਗਪੁਰ, ਠਾਣੇ, ਨਾਸਿਕ, ਔਰੰਗਾਬਾਦ, ਬੈਂਗਲੁਰੂ ਸ਼ਹਿਰੀ, ਨਾਂਦੇੜ, ਦਿੱਲੀ ਤੇ ਅਹਿਮਦਨਗਰ। ਹਫ਼ਤਾਵਾਰੀ ਰਾਸ਼ਟਰੀ ਔਸਤ ਪਾਜ਼ੇਟੀਵਿਟੀ ਰੇਟ 5.65 ਫ਼ੀਸਦ ਹੈ। ਮਹਾਰਾਸ਼ਰ ਦਾ ਹਫ਼ਤਾਵਾਰੀ ਔਸਤ 23 ਫ਼ੀਸਦ ਹੈ, ਪੰਜਾਬ ਦਾ 8.82 ਫ਼ੀਸਦ, ਛੱਤੀਸਗੜ੍ਹ ਦਾ 8 ਫ਼ੀਸਦ, ਮੱਧ ਪ੍ਰਦੇਸ਼ ਦਾ 7.82 ਫ਼ੀਸਦੀ, ਤਾਮਿਲਨਾਡੂ ਦਾ 2.50 ਫ਼ੀਸਦ, ਕਰਨਾਟਕ ਦਾ 2.45 ਫ਼ੀਸਦ, ਗੁਜਰਾਤ ਦਾ 2.2 ਫ਼ੀਸਦ ਤੇ ਦਿੱਲੀ ਦਾ 2.04 ਫ਼ੀਸਦ ਹੈ।
ਦੇਸ਼ ਵਿਚ ਮੌਜੂਦਾ ਸਮੇਂ ਕੋਰੋਨਾ ਦੀ ਸਥਿਤੀ ਸਬੰਧੀ ਨੀਤੀ ਆਯੋਗ ਦੇ ਮੈਂਬਰ (ਸਿਹਤ) ਡਾ. ਵੀਕੇ ਪਾਲ ਨੇ ਕਿਹਾ ਕਿ ਅਸੀਂ ਕੁਝ ਜ਼ਿਲ੍ਹਿਆਂ ਵਿਚ ਤੇਜ਼ੀ ਨਾਲ ਗੰਭੀਰ ਸਥਿਤੀ ਦਾ ਸਾਹਮਣਾ ਕਰ ਰਹੇ ਹਾਂ ਪਰ ਪੂਰਾ ਦੇਸ਼ ਸੰਭਾਵੀ ਰੂਪ ‘ਚ ਜੋਖ਼ਮ ਦੀ ਹਾਲਤ ‘ਚ ਹੈ। ਵਾਇਰਸ ਨੂੰ ਰੋਕਣ ਤੇ ਜੀਵਨ ਬਚਾਉਣ ਦੇ ਸਾਰੇ ਯਤਨ ਕੀਤੇ ਜਾਣੇ ਚਾਹੀਦੇ ਹਨ।