ਇਸਰੋ ਨੇ ਬਦਲਿਆ ਸੈਟੇਲਾਈਟ ਦੇ ਨਾਮਕਰਨ ਦਾ ਤਰੀਕਾ, ਜਾਣੋ ਹੁਣ ਕਿਵੇਂ ਰੱਖਿਆ ਜਾਵੇਗਾ ਨਾਂ

ਭਾਰਤੀ ਪੁਲਾੜ ਰਿਸਰਚ ਆਰਗੇਨਾਈਜੇਸ਼ਨ (ਇਸਰੋ) ਨੇ ਆਪਣੇ ਅਰਥ ਅਬਜ਼ਰਵੇਸ਼ਨ ਸੇਟੇਲਾਈਟ ਦੇ ਨਾਮਕਰਨ ਦਾ ਨਵਾਂ ਤਰੀਕਾ ਅਪਣਾਇਆ ਹੈ। ਹੁਣ ਅਜਿਹੇ ਸੇਟੇਲਾਈਟ ਦਾ ਨਾਂ ‘ਈਓਐੱਸ’ ਨਾਲ ਸ਼ੁਰੂ ਹੋਵੇਗਾ। ਇਸ ਤੋਂ ਅੱਗੇ ਗਿਣਤੀ ਦੇ ਆਧਾਰ ‘ਤੇ ਸੇਟੇਲਾਈਟ ਦੀ ਪਛਾਣ ਹੋਵੇਗੀ।
ਨਾਮਕਰਨ ਦੇ ਨਵੇਂ ਤਰੀਕੇ ਮੁਤਾਬਕ ਇਸਰੋ ਦੇ ਰਡਾਰ ਇਮੇਜਿੰਗ ਸੇਟੇਲਾਈਟ ਤੇ ਰੀਸੈਟ-2ਬੀਆਰ2 ਦਾ ਨਾਂ ਹੁਣ ਈਓਐੱਸ-01 ਹੋਵੇਗਾ। ਇਸ ਸੇਟੇਲਾਈਟ ਨੂੰ ਸੱਤ ਨਵੰਬਰ ਨੂੰ ਸ੍ਰੀਹਰੀਕੋਟਾ ਸਥਿਤ ਸਤੀਸ਼ ਧਵਨ ਪੁਲਾੜ ਕੇਂਦਰ ਤੋਂ ਲਾਂਚ ਕੀਤਾ ਜਾਵੇਗਾ। ਇਸ ਦੇ ਨਾਲ ਹੋਰ ਦੇਸ਼ਾਂ ਦੇ ਨੌ ਸੇਟੇਲਾਈਟ ਦੀ ਵੀ ਲਾਂਚਿੰਗ ਹੋਣੀ ਹੈ। ਇਹ 2020 ‘ਚ ਇਸਰੋ ਦੀ ਪਹਿਲੀ ਲਾਂਚਿੰਗ ਹੋਵੇਗੀ।
ਇਸਰੋ ਨੇ ਦੱਸਿਆ ਕਿ ਈਓਐੱਸ -01 ਤੋਂ ਖੇਤੀ ਤੇ ਆਫਤ ਪ੍ਰਬੰਧਨ ਦੇ ਕੰਮਾਂ ‘ਚ ਮਦਦ ਮਿਲੇਗੀ। ਸਿੰਥੇਟਿਕ ਅਪਚਰ ਰਡਾਰ ਨਾਲ ਲੈੱਸ ਇਹ ਇਮੇਜਿੰਗ ਸੇਟੇਲਾਈਟ ਹਰ ਮੌਸਮ ‘ਚ ਫੋਟੋ ਲੈਣ ‘ਚ ਸਮਰੱਥ ਹੈ। ਇਹ ਦਿਨ-ਰਾਤ ‘ਚ ਫੋਟੋਆਂ ਲੈ ਸਕਦਾ ਹੈ ਤੇ ਇਸ ਨਾਲ ਕਈ ਗਤੀਵਿਧੀਆਂ ‘ਤੇ ਨਜ਼ਰ ਰੱਖਣ ‘ਚ ਮਦਦ ਮਿਲੇਗੀ।

ਇਸ ਵਾਰ ਇਸਰੋ ਪੀਐੱਸਐੱਲਵੀ ਰਾਕੇਟ ਦੇ ਡੀਐੱਲ ਵੈਰੀਏਟ ਦੀ ਵਰਤੋਂ ਕਰੇਗਾ ਜਿਸ ‘ਚ ਦੋ ਸਟ੍ਰੈਪ-ਆਨ ਬੂਸਟਰ ਮੋਟਰਜ਼ ਲੱਗੇ ਹੋਣਗੇ। ਇਸ ਤੋਂ ਪਹਿਲਾਂ ਇਸ ਰਾਕੇਟ ਵੈਰੀਏਟ ਨੂੰ ਪਹਿਲੀ ਵਾਰ 24 ਜਨਵਰੀ 2019 ਨੂੰ ਮਾਈਕ੍ਰੋਸੈਟ ਤੇ ਸੈਟੇਲਾਈਟ ‘ਚ ਵਰਤਿਆ ਗਿਆ ਸੀ।
ਛੋਟੇ ਤਾਰਿਆਂ ਨੂੰ ਪੁਲਾੜ ਵਿਭਾਗ ਦੇ ਵਪਾਰਕ ਸ਼ਾਖਾ, ਨਿਯੂਸਪੇਸ ਇੰਡੀਆ ਲਿਮਟਿਡ ਦੇ ਨਾਲ ਵਪਾਰਕ ਸਮਝੌਤੇ ਦੇ ਤਹਿਤ ਲਾਂਚ ਕੀਤਾ ਜਾ ਰਿਹਾ ਹੈ। ਕੋਰੋਨਾ ਵਾਇਰਸ ਮਹਾਮਾਰੀ ਕਾਰਨ ਇਸਰੋ ਨੇ ਲਾਂਚ ਦੌਰਾਨ ਜਨਤਾ ਲਈ ਰਾਕੇਟ ਲਾਂਚਿੰਗ ਵਿਊ ਗੈਲਰੀ ਨੂੰ ਬੰਦ ਕਰਨ ਦਾ ਫੈਸਲਾ ਕੀਤਾ ਹੈ ਤੇ ਸ੍ਰੀਹਰੀਕੋਟਾ ਰਾਕੇਟ ਬੰਦਰਗਾਹ ‘ਤੇ ਮੀਡੀਆ ਕਰਮੀਆਂ ਦੀ ਭੀੜ ਦੇਖਣ ਨੂੰ ਨਹੀਂ ਮਿਲੇਗੀ।