ਚੰਡੀਗੜ੍ਹ-ਨਗਰ ਨਿਗਮ ਨੇ ਚੰਡੀਗੜ੍ਹ ਦੇ ਸੈਕਟਰ 22-ਡੀ ਦੀ ਮਾਰਕੀਟ ਵੈੱਲਫੇਅਰ ਐਸੋਸੀਏਸ਼ਨ ਵੱਲੋਂ ਤਿਉਹਾਰ ਸਬੰਧੀ ਪਬਲਿਕ ਪਾਰਕਿੰਗ ਵਿੱਚ ਬਣਾਈ ਗਈ ਆਰਜ਼ੀ ਸਟੇਜ ਨੂੰ ਹਟਾ ਦਿੱਤਾ। ਅੱਜ ਸਵੇਰੇ ਨਗਰ ਨਿਗਮ ਦੀ ਟੀਮ ਨੇ ਪਾਰਕਿੰਗ ਵਿੱਚ ਬਣਾਈ ਇਸ ਆਰਜ਼ੀ ਸਟੇਜ ’ਤੇ ਕਾਰਵਾਈ ਕੀਤੀ।
ਐਸੋਸੀਏਸ਼ਨ ’ਤੇ ਦੋਸ਼ ਹੈ ਕਿ ਇਸ ਮਨਜ਼ੂਰੀ ਦੀ ਦੁਰਵਰਤੋਂ ਕਰਕੇ ਇੱਥੇ ਪਬਲਿਕ ਪਾਰਕਿੰਗ ਵਿੱਚ ਕਥਿਤ ਤੌਰ ’ਤੇ ਇੱਕ ਗੈਰ-ਕਾਨੂੰਨੀ ਸਟੇਜ ਬਣਾ ਦਿੱਤੀ ਗਈ। ਇਸ ਸਟੇਜ ’ਤੇ ਬਿਲਕੁਲ ਨਵੀਆਂ ਕਾਰਾਂ ਪਾਰਕ ਕੀਤੀਆਂ ਗਈਆਂ ਸਨ ਅਤੇ ਇਸ ਦੀ ਵਰਤੋਂ ਵਪਾਰਕ ਉਦੇਸ਼ਾਂ ਜਿਵੇਂ ਕਿ ਪ੍ਰਚਾਰ ਅਤੇ ਡਰਾਅ ਲਈ ਕੀਤੀ ਜਾਂਦੀ ਸੀ। ਇਹ ਕਾਰਾਂ ਇੱਥੇ ਮਾਰਕੀਟ ਵਿੱਚ ਖਰੀਦਦਾਰੀ ਕਰਨ ਵਾਲੇ ਆਉਣ ਵਾਲੇ ਗਾਹਕਾਂ ਨੂੰ ਦਿੱਤੀ ਗਏ ਕੂਪਨਾਂ ਵਿੱਚ ਡਰਾਅ ਕੱਢ ਕੇ ਸਪੁਰਦ ਕੀਤੀਆਂ ਜਾਣੀਆਂ ਹਨ। ਨਗਰ ਨਿਗਮ ਦੇ ਨਿਯਮਾਂ ਅਤੇ ਸ਼ਰਤਾਂ ਅਨੁਸਾਰ ਜਨਤਕ ਥਾਵਾਂ ਦੀ ਵਰਤੋਂ ਸਿਰਫ਼ ਨਿਰਧਾਰਤ ਉਦੇਸ਼ਾਂ ਲਈ ਹੀ ਕੀਤੀ ਜਾ ਸਕਦੀ ਹੈ।
ਜਨਤਕ ਪਾਰਕਿੰਗ ਨੂੰ ਵਪਾਰਕ ਉਦੇਸ਼ਾਂ ਲਈ ਵਰਤਣਾ ਨਗਰ ਨਿਗਮ ਐਕਟ ਅਤੇ ਜਨਤਕ ਜਾਇਦਾਦ ਨਿਯਮਾਂ ਦੀ ਉਲੰਘਣਾ ਹੈ।
ਨਗਰ ਨਿਗਮ ਦੀ ਟੀਮ ਨੇ ਨਵੀਂ ਸਟੇਜ ਹਟਾ ਦਿੱਤੀ ਹੈ ਪਰ ਸਰਕਾਰੀ ਥਾਂ ’ਤੇ ਨਾਜਾਇਜ਼ ਕਬਜ਼ਾ ਕਰਨ ਅਤੇ ਜਨਤਕ ਪਾਰਕਿੰਗ ਦੀ ਵਪਾਰਕ ਵਰਤੋਂ ਕਰਨ ’ਤੇ ਨਗਰ ਨਿਗਮ ਮਾਰਕੀਟ ਐਸੋਸੀਏਸ਼ਨ ਨੂੰ ਨਿਯਮਾਂ ਤਹਿਤ ਭਾਰੀ ਜੁਰਮਾਨਾ ਲਗਾ ਸਕਦਾ ਹੈ।