ਰਸਗੁੱਲਾ ਸਮਝ ਕੇ ਚੱਬ ਲਿਆ ਦੇਸੀ ਬੰਬ; ਖ਼ਤਰਨਾਕ ਮਜ਼ਾਕ ਨੇ ਲਈ ਵਿਅਕਤੀ ਦੀ ਜਾਨ

ਡਿੰਡੋਰੀ- ਦੋਸਤਾਂ ਦਰਮਿਆਨ ਕੀਤਾ ਗਿਆ ਇੱਕ ਭਿਆਨਕ ਮਜ਼ਾਕ ਉਸ ਵੇਲੇ ਜਾਨਲੇਵਾ ਸਾਬਤ ਹੋਇਆ ਜਦੋਂ ਇੱਕ ਨੌਜਵਾਨ ਨੂੰ ਆਪਣੀ ਜਾਨ ਤੋਂ ਹੱਥ ਧੋਣੇ ਪਏ। ਇਹ ਦਿਲ ਕੰਬਾਊ ਘਟਨਾ ਉਸ ਸਮੇਂ ਵਾਪਰੀ ਜਦੋਂ ਇੱਕ ਵਿਅਕਤੀ ਨੇ ਆਪਣੇ ਹੀ ਦੋਸਤ ਨੂੰ ਰਸਗੁੱਲੇ ਵਰਗਾ ਬੰਬ (ਵਿਸਫੋਟਕ ਪਦਾਰਥ) ਖੁਆ ਦਿੱਤਾ। ਪੁਲੀਸ ਅਧਿਕਾਰੀਆਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ, ਡਿੰਡੋਰੀ ਜ਼ਿਲ੍ਹੇ ਵਿੱਚ ਇੱਕ 35 ਸਾਲਾ ਵਿਅਕਤੀ ਦੀ ਉਸ ਵੇਲੇ ਦਰਦਨਾਕ ਮੌਤ ਹੋ ਗਈ, ਜਦੋਂ ਉਸ ਦੇ ਦੋਸਤ ਵੱਲੋਂ ਮਜ਼ਾਕ ਵਜੋਂ ਖੁਆਇਆ ਗਿਆ ‘ਰਸਗੁੱਲੇ’ ਵਰਗਾ ਦਿਖਣ ਵਾਲਾ ਦੇਸੀ ਬੰਬ ਉਸ ਦੇ ਮੂੰਹ ਵਿੱਚ ਹੀ ਫਟ ਗਿਆ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਕੋਤਵਾਲੀ ਥਾਣਾ ਇੰਚਾਰਜ ਦੁਰਗਾ ਪ੍ਰਸਾਦ ਨਾਗਪੁਰੇ ਨੇ ਸ਼ੁੱਕਰਵਾਰ ਨੂੰ ਪੱਤਰਕਾਰਾਂ ਨੂੰ ਦੱਸਿਆ ਕਿ ਇਹ ਘਟਨਾ ਬੀਤੀ 10 ਨਵੰਬਰ ਨੂੰ ਰਾਤ ਕਰੀਬ 8 ਵਜੇ ਵਾਪਰੀ ਸੀ। ਘਟਨਾ ਦਾ ਵੇਰਵਾ ਦਿੰਦਿਆਂ ਥਾਣਾ ਇੰਚਾਰਜ ਨਾਗਪੁਰੇ ਨੇ ਦੱਸਿਆ ਕਿ ਮ੍ਰਿਤਕ ਰਾਜਿੰਦਰ ਨੂੰ ਉਸ ਦੇ ਆਪਣੇ ਹੀ ਦੋਸਤ ਨੇ ਮਹਿਜ਼ ਮਜ਼ਾਕ ਵਜੋਂ ਇੱਕ ਦੇਸੀ ਬੰਬ ਖੁਆ ਦਿੱਤਾ, ਜੋ ਕਿ ਦੇਖਣ ਵਿੱਚ ਬਿਲਕੁਲ ਰਸਗੁੱਲੇ ਵਰਗਾ ਲੱਗਦਾ ਸੀ। ਉਨ੍ਹਾਂ ਦੱਸਿਆ ਕਿ ਮਠਿਆਈ ਸਮਝ ਕੇ ਜਦੋਂ ਰਾਜਿੰਦਰ ਨੇ ਇਸ ਨੂੰ ਮੂੰਹ ਵਿੱਚ ਪਾ ਕੇ ਚੱਬਿਆ, ਤਾਂ ਜ਼ੋਰਦਾਰ ਧਮਾਕੇ ਨਾਲ ਇਹ ਬੰਬ ਉਸ ਦੇ ਮੂੰਹ ਵਿੱਚ ਹੀ ਫਟ ਗਿਆ।