ਇੰਡੀਅਨ ਪ੍ਰੀਮੀਅਰ ਲੀਗ ਦੇ 14ਵੇਂ ਸੀਜ਼ਨ ‘ਚ ਕੋਲਕਾਤਾ ਨਾਈਟਰਾਈਜ਼ਰ ਵੱਲੋਂ ਖੇਡ ਰਹੇ ਆਸਟ੍ਰੇਲੀਆ ਦੇ ਤੇਜ਼ ਗੇਂਦਬਾਜ਼ ਪੈਟ ਕਮਿੰਸ ਨੇ ਭਾਰਤ ‘ਚ ਕੋਰੋਨਾ ਦੇ ਮੁਸ਼ਕਿਲ ਸਮੇਂ ‘ਚ ਮਦਦ ਦਾ ਹੱਥ ਵਧਾਇਆ ਹੈ। ਦੇਸ਼ ‘ਚ ਇਸ ਸਮੇਂ ਆਕਸੀਜਨ ਟੈਂਕ ਦੀ ਕਮੀ ਦੀ ਵਜ੍ਹਾ ਕਾਰਨ ਕਈ ਲੋਕਾਂ ਦੀ ਮੌਤ ਹੋ ਗਈ ਹੈ। ਕਮਿੰਸ ਨੇ ਭਾਰਤ ‘ਚ ਆਕਸੀਜਨ ਟੈਂਕ ਦੀ ਕਮੀ ਨੂੰ ਪੂਰਾ ਕਰਨ ਲਈ ਆਪਣੇ ਵੱਲੋਂ 5000 ਹਜ਼ਾਰ ਡਾਲਰ ਸਹਾਇਤਾ ਰਾਸ਼ੀ ਦਾਨ ਦੇਣ ਦਾ ਐਲਾਨ ਕੀਤਾ ਹੈ।
ਕੋਰੋਨਾ ਦੀ ਨਵੀਂ ਲਹਿਰ ਦੇ ਆਉਣ ਤੋਂ ਬਾਅਦ ਹੀ ਭਾਰਤ ‘ਚ ਇਸ ਨਾਲ ਸੰਕ੍ਰਮਿਤਾਂ ਦੀ ਗਿਣਤੀ ਲਗਾਤਾਰ ਵਧਦੀ ਜਾ ਰਹੀ ਹੈ। ਇਕ ਦਿਨ ‘ਚ ਦੋ ਲੱਖ ਤੋਂ ਜ਼ਿਆਦਾ ਗਿਣਤੀ ‘ਚ ਸੰਕ੍ਰਮਿਤ ਲੋਕਾਂ ਦੀ ਲਿਸਟ ਸਾਹਮਣੇ ਆ ਰਹੀ ਹੈ। ਹਸਪਤਾਲ ‘ਚ ਆਕਸੀਜਨ ਦੀ ਕਮੀ ਹੋ ਰਹੀ ਹੈ ਜਿਸ ਦੀ ਵਜ੍ਹਾ ਕਾਰਨ ਲੋਕ ਜਾਨ ਗਵਾ ਰਹੇ ਹਨ। ਸਰਕਾਰ ਹਰ ਸੂਬੇ ‘ਚ ਲਗਾਤਾਰ ਆਕਸਜੀਨ ਟੈਂਕ ਦੀ ਸਪਲਾਈ ਦੇ ਇੰਤਜਾਮ ‘ਚ ਲੱਗੀ ਹੈ।
ਸੋਮਵਾਰ ਨੂੰ ਆਸਟ੍ਰੇਲੀਆ ਦੇ ਤੇਜ਼ ਗੇਂਦਬਾਜ਼ ਕਮਿੰਸ ਨੇ ਸੋਸ਼ਲ ਮੀਡੀਆ ‘ਤੇ ਇਕ ਨੋਟ ਜਾਰੀ ਕਰ ਕੇ ਸਹਾਇਤਾ ਕਰਨ ਦੀ ਗੱਲ ਸਾਂਝੀ ਕੀਤੀ। ਉਨ੍ਹਾਂ ਨੇ ਕਿਹਾ ਕਿ ਉਹ ਇਸ ਮੁਸ਼ਕਿਲ ਸਮੇਂ ‘ਚ ਆਪਣੇ ਵੱਲੋਂ ਆਕਸੀਜਨ ਟੈਂਕ ਖਰੀਦਣ ਲਈ 50 ਹਜ਼ਾਰ ਡਾਲਰ ਭਾਵ ਲਗਪਗ 37 ਲੱਖ ਰੁਪਏ ਦਾਨ ‘ਚ ਦੇ ਰਹੇ ਹਨ।