ਨਿਊਜ਼ੀਲੈਂਡ: ਵ੍ਹਾਈਟ ਆਈਲੈਂਡ ਜਵਾਲਾਮੁਖੀ ‘ਚ ਧਮਾਕਾ , 5 ਦੀ ਮੌਤ

ਵਲਿੰਗਟਨ: ਨਿਊਜ਼ੀਲੈਂਡ ਦੇ ਵ੍ਹਾਈਟ ਆਈਲੈਂਡ ਜਵਾਲਾਮੁਖੀ ਵਿੱਚ ਸੋਮਵਾਰ ਨੂੰ ਅਚਾਨਕ ਧਮਾਕਾ ਹੋ ਗਿਆ । ਇਸ ਧਮਾਕੇ ਦੌਰਾਨ ਜਵਾਲਾਮੁਖੀ ਨੇੜੇ 100 ਲੋਕ ਮੌਜੂਦ ਸਨ, ਜਿਨ੍ਹਾਂ ਨੂੰ ਰੈਸਕਿਊ ਕੀਤਾ ਗਿਆ ਹੈ । ਜਵਾਲਾਮੁਖੀ ਵਿੱਚ ਹੋਏ ਇਸ ਧਮਾਕੇ ਵਿੱਚ ਆਸਟ੍ਰੇਲੀਅਨਾਂ ਸਮੇਤ 13 ਲੋਕਾਂ ਦੇ ਮਾਰੇ ਜਾਣ ਦੀ ਖਬਰ ਹੈ, ਹਾਲਾਂਕਿ 5 ਲੋਕਾਂ ਦੀ ਮੌਤ ਹੋਣ ਦੀ ਪੁਸ਼ਟੀ ਕਰ ਦਿੱਤੀ ਗਈ ਹੈ । ਉੱਥੇ ਹੀ ਇਸ ਧਮਾਕੇ ਵਿੱਚ ਕਈ ਸੈਲਾਨੀਆਂ ਦੇ ਜ਼ਖਮੀ ਹੋਣ ਦੀ ਖਬਰ ਵੀ ਮਿਲੀ ਹੈ । ਇਸ ਮਾਮਲੇ ਵਿੱਚ ਡਾਕਟਰਾਂ ਨੇ ਦੱਸਿਆ ਕਿ ਇਸ ਹਾਦਸੇ ਵਿੱਚ ਕਈ ਲੋਕਾਂ ਦਾ 90 ਫੀਸਦੀ ਸਰੀਰ ਝੁਲਸ ਚੁੱਕਿਆ ਹੈ ।
ਨਿਊਜ਼ੀਲੈਂਡ ਦੀ ਇੱਕ ਏਜੰਸੀ ਮੁਤਾਬਕ ਜਵਾਲਾਮੁਖੀ ਦਾ ਧਮਾਕਾ ਕਾਫੀ ਘੱਟ ਸਮੇਂ ਲਈ ਸੀ । ਇਸ ਧਮਾਕੇ ਵਿੱਚ ਜਵਾਲਾਮੁਖੀ ਦਾ ਧੂੰਆਂ ਅਤੇ ਸਵਾਹ ਆਸਮਾਨ ਵਿੱਚ ਤਕਰੀਬਨ 12 ਹਜ਼ਾਰ ਫੁੱਟ ਤੱਕ ਉੱਪਰ ਗਿਆ । ਇਸ ਸਬੰਧੀ ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਧਮਾਕੇ ਵਿੱਚ ਕਈ ਪੱਥਰਾਂ ਨੂੰ ਵੀ 12 ਹਜ਼ਾਰ ਫੁੱਟ ਤੱਕ ਉੱਪਰ ਉੱਠਦੇ ਹੋਏ ਦੇਖਿਆ ਗਿਆ ਹੈ । ਉਨ੍ਹਾਂ ਦੱਸਿਆ ਕਿ ਜਵਾਲਾਮੁਖੀ ਦੇ ਫੱਟਣ ਕਾਰਨ ਆਈਲੈਂਡ ਦੇ ਨੇੜਲੀਆਂ ਨਦੀਆਂ ਦਾ ਤਾਪਮਾਨ ਵੀ ਵੱਧ ਗਿਆ ਹੈ ।
ਇਸ ਸਬੰਧੀ ਨਿਊਜ਼ੀਲੈਂਡ ਦੀ ਪ੍ਰਧਾਨ ਮੰਤਰੀ ਜੈਸਿੰਡਾ ਅਰਡਰਨ ਨੇ ਕਿਹਾ ਕਿ ਜਵਾਲਾਮੁਖੀ ਟਾਪੂ ਵਿੱਚ ਅਚਾਨਕ ਹੀ ਇੱਕ ਜ਼ਬਰਦਸਤ ਧਮਾਕਾ ਹੋਇਆ । ਉਸ ਸਮੇਂ ਉਥੇ ਕਈ ਸੈਲਾਨੀ ਵੀ ਮੌਜੂਦ ਸਨ । ਸੈਂਟ ਜਾਨ ਐਂਬੂਲੈਂਸ ਮੁਤਾਬਕ ਇਸ ਧਮਾਕੇ ਵਿੱਚ ਲਗਭਗ 20 ਲੋਕ ਜ਼ਖਮੀ ਹੋਏ ਹਨ ।
ਦੱਸ ਦੇਈਏ ਕਿ ਇਸ ਘਟਨਾ ਤੋਂ ਬਾਅਦ ਲੋਕ ਆਪਣੇ ਰਿਸ਼ਤੇਦਾਰਾਂ ਦੇ ਸੁਰੱਖਿਅਤ ਲੱਭ ਜਾਣ ਦੀਆਂ ਅਰਦਾਸਾਂ ਕਰ ਰਹੇ ਹਨ । ਇਸ ਹਾਦਸੇ ਨੂੰ ਆਸਟ੍ਰੇਲੀਆ ਦੇ ਪ੍ਰਧਾਨ ਮੰਤਰੀ ਅਤੇ ਵਿਦੇਸ਼ ਮੰਤਰੀ ਵੱਲੋਂ ਦਰਦਨਾਕ ਦੱਸਿਆ ਗਿਆ ਹੈ ।