ਲਾਹੌਰ, ਆਈਏਐੱਨਐੱਸ : ਪਾਕਿਸਤਾਨ ’ਚ ਹਿੰਦੂ ਤੇ ਈਸਾਈ ਲੜਕੀਆਂ ਦੇ ਜਬਰਨ ਧਰਮ ਪਰਿਵਰਤਨ ਦੀਆਂ ਘਟਨਾਵਾਂ ਰੋਜ਼ਾਨਾ ਦੀ ਗੱਲ ਹੋ ਚੁੱਕੀਆਂ ਹਨ। ਕਿਉਂਕਿ ਪਾਕਿਸਤਾਨੀ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੀ ਸਰਕਾਰ ਨੇ ਅਜਿਹੇ ਮਾਮਲਿਆਂ ਨੂੰ ਹਮੇਸ਼ਾ ਤੋਂ ਨਜ਼ਰ ਅੰਦਾਜ਼ ਕੀਤਾ ਹੈ। ਉਲਟਾ ਇਹ ਦਾਅਵਾ ਵੀ ਕਰਦੇ ਰਹੇ ਹਨ ਕਿ ਉਨ੍ਹਾਂ ਦੇ ਸ਼ਾਸਨ ’ਚ ਸਾਰੇ ਧਰਮਾਂ ਦੇ ਲੋਕਾਂ ਨੂੰ ਪੂਰੀ ਆਜ਼ਾਦੀ ਹੈ ਪਰ ਹਾਲ ਹੀ ’ਚ ਈਸਾਈ ਬੱਚੀ 13 ਸਾਲ ਦੀ ਆਰਜੂ ਰਜਾ ਦੇ ਅਗਵਾ ਤੋਂ ਬਾਅਦ ਉਸ ਨੂੰ ਜ਼ਬਰਦਸਤੀ ਇਸਲਾਮ ਕਬੂਲ ਕਰਵਾਏ ਜਾਣ ਤੋਂ ਬਾਅਦ ਇਕ ਮੁਸਲਮਾਨ ਨਾਲ ਉਸ ਦਾ ਨਿਕਾਹ ਪੜ੍ਹੇ ਜਾਣ ਦੀ ਘਟਨਾ ਨੇ ਇਕ ਵਾਰ ਫਿਰ ਪਾਕਿਸਤਾਨ ਦੀ ਅਸਲੀਅਤ ਸਭ ਦੇ ਸਾਹਮਣੇ ਲਿਆ ਦਿੱਤੀ ਹੈ।
ਨਾਬਾਲਗ ਆਰਜੂ ’ਤੇ ਹੋਏ ਜ਼ੁਲਮ ਦੀ ਚਰਚਾ ਪਾਕਿਸਤਾਨੀ ਮੀਡੀਆ ਤੋਂ ਲੈ ਕੇ ਇੰਟਰਨੈੱਟ ਮੀਡੀਆ ਤਕ ਹੈ। ਪਾਕਿਸਤਾਨ ’ਚ ਇਹ ਸਾਲ 2020 ਦੀ ਸਭ ਤੋਂ ਵੱਡੀਆਂ ਖਬਰਾਂ ’ਚੋਂ ਇਕ ਹੈ। ਆਰਜੂ ਨੂੰ ਜਬਰਨ ਈਸਾਈ ਤੋਂ ਮੁਸਲਮਾਨ ਬਣਾਉਣ ਦੀ ਘਟਨਾ ਨੇ ਪਾਕਿਸਤਾਨ ’ਚ ਜਬਰਨ ਧਰਮ ਬਦਲਣ ਤੇ ਬਾਲ ਵਿਆਹ ਨੇ ਲੋਕਾਂ ਨੂੰ ਸੋਚਣ ਲਈ ਮਜਬੂਰ ਕਰ ਦਿੱਤਾ ਹੈ।
ਪਾਕਿਸਤਾਨ ’ਚ ਆਰਜੂ ਵਰਗੀਆਂ ਨਾਬਾਲਗ ਘੱਟ ਗਿਣਤੀ ਬੱਚੀਆਂ ਦਾ ਜੀਵਨ ਕਿੰਨੇ ਵੱਡੇ ਖਤਰੇ ’ਚ ਹੈ। ਇਹ ਉਜਾਗਰ ਹੋ ਚੁੱਕਾ ਹੈ। ਅਜਿਹੇ ਬਹੁਤ ਸਾਰੇ ਮਾਮਲੇ ਹਨ ਜੋ ਪਾਕਿਸਤਾਨੀ ਅਦਾਲਤਾਂ ਤਕ ਵੀ ਪਹੰੁਚਦੇ ਹਨ ਪਰ ਉੱਥੇ ਵੀ ਇਨ੍ਹਾਂ ਸਿੱਖ, ਈਸਾਈ ਤੇ ਹਿੰਦੂ ਲੜਕੀਆਂ ਨੂੰ ਨਿਆਂ ਨਹੀਂ ਮਿਲ ਸਕਿਆ ਹੈ।
ਪਾਕਿਸਤਾਨ ’ਚ ਘੱਟਗਿਣਤੀ ਭਾਈਚਾਰਾ ਅਸੁਰੱਖਿਅਤ
ਨੇਹਾ ਪਰਵੇਜ ਨਾਂ ਦੀ ਇਕ ਲੜਕੀ ਨੂੰ 28 ਅਪ੍ਰੈਲ 2019 ਨੂੰ ਕਰਾਚੀ ਦੇ ਇਤੇਹਾਦ ਕਸਬੇ ਤੋਂ ਅਗਵਾ ਕਰ ਲਿਆ ਗਿਆ ਸੀ। ਉਹ ਵੀ ਉਦੋਂ ਨਾਬਾਲਗ ਸੀ ਜਦੋਂ ਉਸ ਦਾ ਜਬਰਨ ਧਰਮਪਰਿਵਰਤਨ ਕਰ ਕੇ ਉਸ ਦਾ ਨਿਕਾਹ ਇਮਰਾਨ ਨਾਂ ਦੇ ਮੁਸਲਮਾਨ ਨਾਲ ਕਰਵਾ ਦਿੱਤਾ ਗਿਆ। ਅਜਿਹੀਆਂ ਘਟਨਾਵਾਂ ਦੱਸਦੀਆਂ ਹਨ ਕਿ ਪਾਕਿਸਤਾਨ ’ਚ ਘੱਟ ਗਿਣਤੀਆਂ ਭਾਈਚਾਰਾ ਕਿੰਨਾ ਅਸੁੱਰਖਿਅਤ ਹੈ।