ਸ਼ਿਮਲਾ- ਹਿਮਾਚਲ ਪ੍ਰਦੇਸ਼ ਦੇ ਦੂਰ-ਦੁਰਾਡੇ ਅਤੇ ਪਹਾੜੀ ਇਲਾਕਿਆਂ ਵਿੱਚ ਹਵਾਈ ਸੰਪਰਕ ਨੂੰ ਮਜ਼ਬੂਤ ਕਰਨ ਦੇ ਉਦੇਸ਼ ਨਾਲ ਅੱਜ ਤੋਂ ਕੁੱਲੂ, ਮੰਡੀ ਅਤੇ ਚੰਡੀਗੜ੍ਹ ਦਰਮਿਆਨ ਰੋਜ਼ਾਨਾ ਹੈਲੀਕਾਪਟਰ ਸੇਵਾਵਾਂ ਦੀ ਸ਼ੁਰੂਆਤ ਕਰ ਦਿੱਤੀ ਗਈ ਹੈ। ਮੁੱਖ ਮੰਤਰੀ ਸੁਖਵਿੰਦਰ ਸਿੰਘ ਸੁੱਖੂ ਨੇ ਮੰਡੀ ਵਿਚ ਨਵੇਂ ਵਿਕਸਤ ਕੀਤੇ ਗਏ ਕੰਗਣੀਧਾਰ ਹੈਲੀਪੋਰਟ ਤੋਂ ਮੰਡੀ-ਚੰਡੀਗੜ੍ਹ ਅਤੇ ਕੁੱਲੂ-ਮੰਡੀ-ਚੰਡੀਗੜ੍ਹ ਵਿਚਕਾਰ ਚੱਲਣ ਵਾਲੀਆਂ ਇਨ੍ਹਾਂ ਹੈਲੀਕਾਪਟਰ ਸੇਵਾਵਾਂ ਦਾ ਵਰਚੁਅਲੀ ਉਦਘਾਟਨ ਕੀਤਾ। ਮੰਡੀ-ਚੰਡੀਗੜ੍ਹ ਹੈਲੀਕਾਪਟਰ ਸੇਵਾ ਭਾਰਤ ਸਰਕਾਰ ਦੀ ਖੇਤਰੀ ਸੰਪਰਕ ਯੋਜਨਾ (ਆਰਸੀਐਸ-ਉਡਾਨ) ਤਹਿਤ ਚਲਾਈ ਜਾਵੇਗੀ, ਜਦੋਂ ਕਿ ਕੁੱਲੂ-ਮੰਡੀ-ਚੰਡੀਗੜ੍ਹ ਰੂਟ ਦਾ ਸੰਚਾਲਨ ਹੈਰੀਟੇਜ ਐਵੀਏਸ਼ਨ ਪ੍ਰਾਈਵੇਟ ਲਿਮਟਿਡ ਕੰਪਨੀ ਵੱਲੋਂ ਕੀਤਾ ਜਾਵੇਗਾ।
ਇਸ ਹੈਲੀਕਾਪਟਰ ਸੇਵਾ ਦੇ ਸਮੇਂ ਦੀ ਗੱਲ ਕਰੀਏ ਤਾਂ ਕੁੱਲੂ ਤੋਂ ਹੈਲੀਕਾਪਟਰ ਸਵੇਰੇ 9:00 ਵਜੇ ਉਡਾਣ ਭਰੇਗਾ ਅਤੇ 9:10 ਵਜੇ ਮੰਡੀ ਪਹੁੰਚੇਗਾ। ਇਸ ਤੋਂ ਬਾਅਦ ਇਹ ਸਵੇਰੇ 9:15 ਵਜੇ ਮੰਡੀ ਤੋਂ ਰਵਾਨਾ ਹੋ ਕੇ 9:45 ਵਜੇ ਚੰਡੀਗੜ੍ਹ ਪਹੁੰਚੇਗਾ। ਵਾਪਸੀ ਵਿੱਚ ਇਹ ਹੈਲੀਕਾਪਟਰ ਚੰਡੀਗੜ੍ਹ ਤੋਂ ਸਵੇਰੇ 10:00 ਵਜੇ ਉਡਾਣ ਭਰ ਕੇ 10:30 ਵਜੇ ਮੰਡੀ ਪਹੁੰਚੇਗਾ ਅਤੇ ਮੰਡੀ ਤੋਂ 10:35 ਵਜੇ ਰਵਾਨਾ ਹੋ ਕੇ ਸਵੇਰੇ 10:45 ਵਜੇ ਕੁੱਲੂ ਪਹੁੰਚ ਜਾਵੇਗਾ। ਕਿਰਾਏ ਦੇ ਸਬੰਧ ਵਿੱਚ ਉਡਾਨ ਯੋਜਨਾ ਤਹਿਤ ਮੰਡੀ-ਚੰਡੀਗੜ੍ਹ ਰੂਟ ਦਾ ਅਨੁਮਾਨਿਤ ਹਵਾਈ ਕਿਰਾਇਆ 3500 ਰੁਪਏ ਤੈਅ ਕੀਤਾ ਗਿਆ ਹੈ, ਜਦੋਂ ਕਿ ਕੁੱਲੂ-ਮੰਡੀ-ਚੰਡੀਗੜ੍ਹ ਰੂਟ ਦਾ ਅਨੁਮਾਨਿਤ ਕਿਰਾਇਆ 8500 ਰੁਪਏ ਰੱਖਿਆ ਗਿਆ ਹੈ। ਆਧੁਨਿਕ ਯਾਤਰੀ ਸਹੂਲਤਾਂ ਅਤੇ ਜ਼ਰੂਰੀ ਬੁਨਿਆਦੀ ਢਾਂਚੇ ਨਾਲ ਲੈਸ ਕੰਗਣੀਧਾਰ ਹੈਲੀਪੋਰਟ ਰਾਜ ਦੇ ਕੇਂਦਰੀ ਖੇਤਰ ਲਈ ਇੱਕ ਮਹੱਤਵਪੂਰਨ ਹਵਾਈ ਕੇਂਦਰ ਵਜੋਂ ਕੰਮ ਕਰੇਗਾ।
ਸੈਰ-ਸਪਾਟੇ ਨੂੰ ਹੁੰਗਾਰਾ ਅਤੇ ਹਰ ਜ਼ਿਲ੍ਹੇ ਵਿੱਚ ਹੈਲੀਪੋਰਟ ਬਣਾਉਣ ਦੀ ਯੋਜਨਾ- ਮੁੱਖ ਮੰਤਰੀ ਸੁਖਵਿੰਦਰ ਸਿੰਘ ਸੁੱਖੂ ਨੇ ਦੱਸਿਆ ਕਿ ਸੂਬਾ ਸਰਕਾਰ ਹਿਮਾਚਲ ਦੇ ਪਹਾੜੀ ਅਤੇ ਪਛੜੇ ਇਲਾਕਿਆਂ ਤੱਕ ਹਵਾਈ ਪਹੁੰਚ ਆਸਾਨ ਬਣਾਉਣ ਲਈ ਲਗਾਤਾਰ ਯਤਨ ਕਰ ਰਹੀ ਹੈ। ਉਨ੍ਹਾਂ ਉਮੀਦ ਪ੍ਰਗਟਾਈ ਕਿ ਇਹ ਸੇਵਾਵਾਂ ਸ਼ੁਰੂ ਹੋਣ ਨਾਲ ਯਾਤਰਾ ਦੇ ਸਮੇਂ ਵਿੱਚ ਵੱਡੀ ਕਮੀ ਆਵੇਗੀ, ਸੈਰ-ਸਪਾਟੇ ਨੂੰ ਹੁਲਾਰਾ ਮਿਲੇਗਾ, ਐਮਰਜੈਂਸੀ ਸਥਿਤੀਆਂ ਵਿੱਚ ਤੁਰੰਤ ਮਦਦ ਪਹੁੰਚਾਉਣ ਦੀ ਸਮਰੱਥਾ ਵਧੇਗੀ ਅਤੇ ਸਥਾਨਕ ਲੋਕਾਂ ਦੇ ਨਾਲ-ਨਾਲ ਬਾਹਰੋਂ ਆਉਣ ਵਾਲੇ ਸੈਲਾਨੀਆਂ ਨੂੰ ਵੀ ਵੱਡੀ ਸਹੂਲਤ ਮਿਲੇਗੀ।
ਰਾਜ ਵਿੱਚ ਸੈਰ-ਸਪਾਟੇ ਦੇ ਵਿਕਾਸ ‘ਤੇ ਵਿਸ਼ੇਸ਼ ਜ਼ੋਰ ਦਿੰਦਿਆਂ ਮੁੱਖ ਮੰਤਰੀ ਨੇ ਕਿਹਾ ਕਿ ਸੂਬਾ ਸਰਕਾਰ ਹਰ ਜ਼ਿਲ੍ਹੇ ਦੇ ਮੁੱਖ ਦਫ਼ਤਰ ਅਤੇ ਹੋਰ ਪ੍ਰਮੁੱਖ ਸੈਰ-ਸਪਾਟਾ ਸਥਾਨਾਂ ‘ਤੇ ਹੈਲੀਪੋਰਟਾਂ ਦਾ ਨਿਰਮਾਣ ਕਰ ਰਹੀ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਕੜੀ ਤਹਿਤ ਹਮੀਰਪੁਰ ਜ਼ਿਲ੍ਹੇ ਦੇ ਜਸਕੋਟ, ਕਾਂਗੜਾ ਜ਼ਿਲ੍ਹੇ ਦੇ ਰੱਕੜ ਅਤੇ ਪਾਲਮਪੁਰ, ਅਤੇ ਚੰਬਾ ਵਿਖੇ ਚਾਰ ਹੈਲੀਪੋਰਟਾਂ ਦਾ ਨਿਰਮਾਣ ਕਾਰਜ ਆਪਣੇ ਆਖਰੀ ਪੜਾਅ ‘ਤੇ ਹੈ ਅਤੇ ਇਹ ਜਲਦੀ ਹੀ ਮੁਕੰਮਲ ਹੋ ਜਾਵੇਗਾ।