ਨਵੀਂ ਦਿੱਲੀ: ਭਾਰਤ ਸਰਕਾਰ ਨੇ ਮੱਧ-ਪੂਰਬ ਵਿਚ ਵਧ ਰਹੇ ਸੰਕਟ ਦੇ ਮੱਦੇਨਜ਼ਰ ਰਸੋਈ ਗੈਸ (ਐਲ.ਪੀ.ਜੀ.) ਦਾ ਉਤਪਾਦਨ ਵਧਾਉਣ ਲਈ ਦੇਸ਼ ਦੀਆਂ ਸਾਰੀਆਂ ਰਿਫਾਈਨਰੀਆਂ ਨੂੰ ਤੁਰਤ ਹੁਕਮ ਜਾਰੀ ਕੀਤੇ ਹਨ। ਇਰਾਨ-ਇਜ਼ਰਾਇਲ ਜੰਗ ਕਾਰਨ ਸਪਲਾਈ ਚੇਨ ਪ੍ਰਭਾਵਤ ਹੋਣ ਦੀ ਸੰਭਾਵਨਾ ਹੈ, ਜਿਸ ਨਾਲ ਘਰੇਲੂ ਬਾਜ਼ਾਰ ਵਿਚ ਗੈਸ ਦੀ ਕਮੀ ਪੈ ਸਕਦੀ ਹੈ। ਸਰਕਾਰ ਨੇ ਐਮਰਜੈਂਸੀ ਪਾਵਰ ਵਰਤਦਿਆਂ ਰਿਫਾਈਨਰੀਆਂ ਨੂੰ ਪ੍ਰੋਪੇਨ ਅਤੇ ਬਿਊਟੇਨ ਸਿਰਫ ਐਲ.ਪੀ.ਜੀ. ਬਣਾਉਣ ਲਈ ਵਰਤਣ ਦਾ ਹੁਕਮ ਦਿਤਾ ਹੈ।
ਸਰਕਾਰੀ ਤੇਲ ਕੰਪਨੀਆਂ—ਆਈ.ਓ.ਸੀ., ਐਚ.ਪੀ.ਸੀ.ਐਲ. ਅਤੇ ਬੀ.ਪੀ.ਸੀ.ਐਲ.— ਨੂੰ ਪ੍ਰਾਥਮਿਕਤਾ ਦੇਣ ਦਾ ਫ਼ੈਸਲਾ ਕੀਤਾ ਗਿਆ ਹੈ ਤਾਂ ਜੋ ਦੇਸ਼ ਦੇ 33 ਕਰੋੜ ਤੋਂ ਵੱਧ ਐਲ.ਪੀ.ਜੀ. ਉਪਭੋਗਤਾਵਾਂ ਨੂੰ ਸਿਲੰਡਰ ਦੀ ਸਪਲਾਈ ਬਿਨਾ ਰੁਕਾਵਟ ਜਾਰੀ ਰਹੇ। ਹਾਲਾਂਕਿ ਇਸ ਫ਼ੈਸਲੇ ਨਾਲ ਪ੍ਰਾਈਵੇਟ ਕੰਪਨੀਆਂ, ਖ਼ਾਸਕਰ ਰਿਲਾਇੰਸ ਇੰਡਸਟਰੀਜ਼, ਦੇ ਪੈਟਰੋਕੈਮਿਕਲ ਉਤਪਾਦਨ ਤੇ ਨਫ਼ੇ ਉਤੇ ਅਸਰ ਪੈ ਸਕਦਾ ਹੈ। ਇਸੇ ਦੌਰਾਨ, ਕਤਰ ਵਿਚ ਐਲ.ਐਨ.ਜੀ. ਉਤਪਾਦਨ ਰੁਕਣ ਕਾਰਨ ਭਾਰਤ ਵਿਚ ਗੈਸ ਦੀ ਸਪਲਾਈ 40% ਘਟ ਗਈ ਹੈ।