ਨਵੀਂ ਦਿੱਲੀ-ਰਿਟਾਇਰਮੈਂਟ ਫੰਡ ਬਾਰੇ ਸੰਸਥਾ ਇੰਪਲਾਈਜ਼ ਪ੍ਰੋਵੀਡੈਂਟ ਫੰਡ ਆਰਗੇਨਾਈਜ਼ੇਸ਼ਨ (EPFO) ਨੇ ਮੁਲਾਜ਼ਮਾਂ ਦੇ ਪ੍ਰੋਵੀਡੈਂਟ ਫੰਡ ਵਿਚ ਜਮ੍ਹਾਂ ਰਾਸ਼ੀ ’ਤੇ ਮਿਲਦੇ 8.25 ਫੀਸਦ ਵਿਆਜ ਨੂੰ ਵਿੱਤੀ ਸਾਲ 2024-25 ਵਿਚ ਵੀ ਬਰਕਰਾਰ ਰੱਖਣ ਦਾ ਫੈਸਲਾ ਕੀਤਾ ਹੈ।
ਈਪੀਐੱਫਓ ਨੇ ਫਰਵਰੀ 2024 ਵਿੱਚ ਵਿੱਤੀ ਸਾਲ 2023-24 ਲਈ ਈਪੀਐੱਫ ’ਤੇ ਵਿਆਜ ਦਰ 0.10 ਫੀਸਦ ਦੇ ਮਾਮੂਲੀ ਵਾਧੇ ਨਾਲ 8.25 ਫੀਸਦ ਕਰ ਦਿੱਤੀ ਸੀ। ਵਿੱਤੀ 2022-23 ਵਿੱਚ ਵਿਆਜ ਦਰ 8.15 ਫੀਸਦ ਸੀ।
ਮਾਰਚ 2022 ਵਿੱਚ EPFO ਨੇ 2021-22 ਲਈ ਈਪੀਐੱਫ ’ਤੇ ਵਿਆਜ ਨੂੰ ਆਪਣੇ ਸੱਤ ਕਰੋੜ ਤੋਂ ਵੱਧ ਗਾਹਕਾਂ ਲਈ ਚਾਰ ਦਹਾਕਿਆਂ ਦੇ ਹੇਠਲੇ ਪੱਧਰ 8.1 ਫੀਸਦ ਤੱਕ ਘਟਾ ਦਿੱਤਾ ਸੀ, ਜੋ ਕਿ 2020-21 ਵਿੱਚ 8.5 ਪ੍ਰਤੀਸ਼ਤ ਸੀ।
ਇੱਕ ਸੂਤਰ ਨੇ ਕਿਹਾ, ‘‘ਈਪੀਐਫਓ ਦੀ ਸਰਵਉੱਚ ਫੈਸਲਾ ਲੈਣ ਵਾਲੀ ਸੰਸਥਾ ਸੈਂਟਰਲ ਬੋਰਡ ਆਫ਼ ਟਰੱਸਟੀਜ਼ (ਸੀਬੀਟੀ) ਨੇ ਸ਼ੁੱਕਰਵਾਰ ਨੂੰ ਆਪਣੀ ਮੀਟਿੰਗ ਵਿੱਚ 2024-25 ਲਈ ਈਪੀਐਫ ਉੱਤੇ 8.25 ਪ੍ਰਤੀਸ਼ਤ ਵਿਆਜ ਦੇਣ ਦਾ ਫੈਸਲਾ ਕੀਤਾ ਹੈ।’’