ਚੀਨ ਦੇ ਦੱਖਣ-ਪੱਛਮ ਵਿਚ ਸਥਿਤ ਸਿਚੁਆਨ ਸੂਬੇ ਵਿਚ ਸੋਮਵਾਰ ਨੂੰ ਆਏ ਭੂਚਾਲ ਨੇ ਬਹੁਤ ਤਬਾਹੀ ਮਚਾਈ ਹੈ। ਇਸ ਵਿੱਚ ਹੁਣ ਤਕ 65 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਇਸ ਔਖੀ ਘੜੀ ਵਿੱਚ ਤਾਈਵਾਨ ਚੀਨ ਦੇ ਨਾਲ ਖੜ੍ਹਾ ਹੈ।
ਤਾਈਵਾਨ ਨੇ ਕੁਦਰਤੀ ਆਫ਼ਤ ਨੂੰ ਲੈ ਕੇ ਚੀਨ ਪ੍ਰਤੀ ਆਪਣੀ ਸੰਵੇਦਨਾ ਪ੍ਰਗਟ ਕੀਤੀ ਹੈ ਅਤੇ ਇਹ ਵੀ ਕਿਹਾ ਹੈ ਕਿ ਤਾਈਵਾਨ ਇੱਕ ਬਚਾਅ ਦਲ ਭੇਜਣ ਲਈ ਤਿਆਰ ਹੈ।
ਚੀਨ ਦੀ ਮਦਦ ਲਈ ਤਾਈਵਾਨ ਤਿਆਰ
ਚੀਨ ਜਿੱਥੇ ਤਾਈਵਾਨ ਨੂੰ ਆਪਣਾ ਹਿੱਸਾ ਮੰਨਦਾ ਹੈ, ਉਥੇ ਤਈਵਾਨ ਇਸ ਦੇ ਖ਼ਿਲਾਫ਼ ਹੈ ਅਤੇ ਇਸ ਦੌਰਾਨ ਅਮਰੀਕੀ ਕਾਂਗਰਸ ਦੀ ਸਪੀਕਰ ਨੈਨਸੀ ਪੇਲੋਸੀ ਦੇ ਪਿਛਲੇ ਮਹੀਨੇ ਤਾਈਪੇ ਦੌਰੇ ਤੋਂ ਬਾਅਦ ਫੌਜੀ ਅਭਿਆਸਾਂ ਨੂੰ ਲੈ ਕੇ ਦੋਵਾਂ ਦੇਸ਼ਾਂ ਵਿਚਾਲੇ ਤਣਾਅ ਹੈ। ਤਾਈਵਾਨ ਦੇ ਰਾਸ਼ਟਰਪਤੀ ਦਫਤਰ ਨੇ ਕਿਹਾ ਕਿ ਰਾਸ਼ਟਰਪਤੀ ਸਾਈ ਇੰਗ ਵੇਨ ਨੇ ਚੀਨ ਪ੍ਰਤੀ ਆਪਣੀ ਚਿੰਤਾ ਅਤੇ ਹਮਦਰਦੀ ਪ੍ਰਗਟ ਕੀਤੀ ਹੈ।
ਇੰਨਾ ਹੀ ਨਹੀਂ ਉਨ੍ਹਾਂ ਨੇ ਚੀਨ ‘ਚ ਭੂਚਾਲ ਕਾਰਨ ਜਾਨ ਗੁਆਉਣ ਵਾਲਿਆਂ ਪ੍ਰਤੀ ਵੀ ਸੰਵੇਦਨਾ ਜ਼ਾਹਰ ਕੀਤੀ ਹੈ। ਤਾਈਵਾਨ ਨੇ ਉਮੀਦ ਜਤਾਈ ਹੈ ਕਿ ਚੀਨ ‘ਚ ਇਸ ਦੌਰਾਨ ਬਚਾਅ ਕਾਰਜ ਵੀ ਬਿਨਾਂ ਕਿਸੇ ਦਿੱਕਤ ਦੇ ਹੋਣਗੇ ਅਤੇ ਆਮ ਜਨਜੀਵਨ ਵੀ ਜਲਦੀ ਹੀ ਲੀਹ ‘ਤੇ ਆ ਜਾਵੇਗਾ।
ਤਾਈਵਾਨ ਨੇ ਬਚਾਅ ਦਲ ਲਈ ਪੂਰੇ ਪ੍ਰਬੰਧ ਕੀਤੇ
ਇਸ ਦੌਰਾਨ ਰਾਸ਼ਟਰਪਤੀ ਦਫ਼ਤਰ ਨੇ ਇਹ ਵੀ ਕਿਹਾ ਕਿ ਉਨ੍ਹਾਂ ਨੂੰ ਸਿਚੁਆਨ ਭੂਚਾਲ ਵਿੱਚ ਕਿਸੇ ਤਾਈਵਾਨੀ ਨਾਗਰਿਕ ਦੀ ਮੌਤ ਦੀ ਕੋਈ ਸੂਚਨਾ ਨਹੀਂ ਮਿਲੀ ਹੈ। ਤਾਈਵਾਨ ਦੇ ਫਾਇਰ ਡਿਪਾਰਟਮੈਂਟ ਨੇ ਕਿਹਾ ਕਿ ਉਨ੍ਹਾਂ ਨੇ 40 ਵਿਅਕਤੀਆਂ ਦੀ ਬਚਾਅ ਟੀਮ, ਇੱਕ ਸੁੰਘਣ ਵਾਲਾ ਕੁੱਤਾ ਅਤੇ ਪੰਜ ਟਨ ਰਸਦ ਇਕੱਠੇੀ ਕੀਤੀ ਹੈ। ਆਰਡਰ ਮਿਲਦੇ ਹੀ ਉਹ ਤੁਰੰਤ ਚੀਨ ਭੇਜ ਦੇਵੇਗਾ। ਵਿਭਾਗ ਨੇ ਕਿਹਾ ਕਿ ਸਰਹੱਦਾਂ ਤੋਂ ਪਾਰ, ਉਨ੍ਹਾਂ ਦੀ ਭਾਵਨਾ ਹੁਣ ਮਾਨਵਤਾਵਾਦੀ ਕੰਮ ਅਤੇ ਬਿਪਤਾ ਦੇ ਸਮੇਂ ਵਿੱਚ ਰਾਹਤ ਪ੍ਰਦਾਨ ਕਰਨ ‘ਤੇ ਹੈ।
ਜ਼ਿਕਰਯੋਗ ਹੈ ਕਿ ਤਾਈਵਾਨ ਵਿੱਚ ਅਕਸਰ ਭੂਚਾਲ ਆਉਂਦੇ ਰਹਿੰਦੇ ਹਨ। ਇਸ ਤੋਂ ਪਹਿਲਾਂ ਵੀ ਸਾਲ 2008 ‘ਚ ਆਏ ਭੂਚਾਲ ‘ਚ ਕਰੀਬ 70,000 ਲੋਕਾਂ ਦੀ ਮੌਤ ਹੋ ਗਈ ਸੀ ਅਤੇ ਕਾਫੀ ਨੁਕਸਾਨ ਹੋਇਆ ਸੀ। ਉਸ ਸਮੇਂ ਤਾਈਵਾਨ ਨੇ ਵੀ ਇੱਕ ਟੀਮ ਚੀਨ ਭੇਜੀ ਸੀ।