Kedarnath Temple doors open: ਕੋਰੋਨਾ ਵਾਇਰਸ ਦੇ ਖਿਲਾਫ਼ ਜਾਰੀ ਜੰਗ ਵਿਚਾਲੇ ਕੇਦਾਰਨਾਥ ਮੰਦਿਰ ਦੇ ਕਪਾਟ ਬੁੱਧਵਾਰ ਯਾਨੀ ਕਿ ਅੱਜ ਸਵੇਰੇ 6.10 ਵਜੇ ਖੋਲ੍ਹ ਦਿੱਤੇ ਗਏ ਹਨ । ਕਪਾਟ ਖੁੱਲ੍ਹਣ ਤੋਂ ਬਾਅਦ ਸਭ ਤੋਂ ਪਹਿਲਾਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਨਾਮ ‘ਤੇ ਰੁਦਰਭਿਸ਼ੇਕ ਪੂਜਾ ਕੀਤੀ ਗਈ । ਹਾਲਾਂਕਿ, ਮੌਜੂਦਾ ਸਮੇਂ ਕੋਰੋਨਾ ਸੰਕਟ ਕਾਰਨ ਸ਼ਰਧਾਲੂਆਂ ਨੂੰ ਮੰਦਿਰ ਵਿੱਚ ਜਾਣ ਦੀ ਆਗਿਆ ਨਹੀਂ ਹੈ । ਇਹ ਸ਼ਾਇਦ ਪਹਿਲੀ ਵਾਰ ਹੋਇਆ ਹੈ ਜਦੋਂ ਮੰਦਿਰ ਦੇ ਕਪਾਟ ਖੁੱਲ੍ਹਣ ਦੌਰਾਨ ਸ਼ਰਧਾਲੂਆਂ ਦੀ ਕੋਈ ਲਾਈਨ ਨਹੀਂ ਸੀ । ਕਪਾਟ ਖੋਲ੍ਹਣ ਦੌਰਾਨ ਇੱਥੇ ਸਿਰਫ 15 ਤੋਂ 16 ਲੋਕ ਮੌਜੂਦ ਸਨ ।
ਦਰਅਸਲ, ਕੇਦਾਰਨਾਥ ਧਾਮ ਦੇ ਰਾਵਲ ਭੀਮਾਸ਼ੰਕਰ ਲਿੰਗ ਉਖੀਮਥ ਵਿਖੇ 14 ਦਿਨਾਂ ਲਈ ਕੁਆਰੰਟੀਨ ਵਿੱਚ ਹੈ, ਇਸ ਲਈ ਪੁਜਾਰੀ ਸ਼ਿਵਸ਼ੰਕਰ ਲਿੰਗ ਨੇ ਕਪਾਟ ਖੋਲ੍ਹਣ ਦੀ ਪਰੰਪਰਾ ਨੂੰ ਪੂਰਾ ਕੀਤਾ । ਰਾਵਲ 19 ਅਪ੍ਰੈਲ ਨੂੰ ਮਹਾਰਾਸ਼ਟਰ ਤੋਂ ਉਤਰਾਖੰਡ ਵਾਪਸ ਆਏ ਹਨ, ਕੁਆਰੰਟੀਨ ਖਤਮ ਤੋਂ ਬਾਅਦ ਉਹ 3 ਮਈ ਨੂੰ ਕੇਦਾਰਨਾਥ ਪਹੁੰਚ ਜਾਣਗੇ । ਉਨ੍ਹਾਂ ਦੇ ਨਾਲ ਦੇਵਸਥਾਨਮ ਬੋਰਡ ਦੇ ਨੁਮਾਇੰਦੇ ਵਜੋਂ ਬੀਡੀ ਸਿੰਘ ਸਮੇਤ ਪੰਚਗਾਈ ਨਾਲ ਸਬੰਧਿਤ 20 ਕਰਮਚਾਰੀ ਕਪਾਟ ਖੁੱਲ੍ਹਣ ‘ਤੇ ਇੱਥੇ ਪਹੁੰਚੇ । ਇਸ ਤੋਂ ਇਲਾਵਾ ਪੁਲਿਸ ਅਤੇ ਪ੍ਰਸ਼ਾਸਨ ਦੇ ਲਗਭਗ 15 ਲੋਕ ਇੱਥੇ ਮੌਜੂਦ ਸਨ ।
ਕੋਰੋਨਾ ਸੰਕਟ ਵਿਚਕਾਰ ਮੰਦਿਰ ਵਿੱਚ ਪੂਜਾ ਦੌਰਾਨ ਸਮਾਜਿਕ ਦੂਰੀਆਂ ਦਾ ਵੀ ਧਿਆਨ ਰੱਖਿਆ ਗਿਆ. ਪ੍ਰਸ਼ਾਸਨ ਨੇ ਭੀੜ ਤੋਂ ਬਚਣ ਲਈ ਸ਼ਰਧਾਲੂਆਂ ਨੂੰ ਮੰਦਿਰ ਆਉਣ ਦੀ ਆਗਿਆ ਨਹੀਂ ਦਿੱਤੀ । ਸੈਰ-ਸਪਾਟਾ-ਧਰਮ ਦੇ ਸਕੱਤਰ ਦਿਲੀਪ ਜਵਾਲਕਰ ਨੇ ਯਾਤਰਾ ਨਾਲ ਜੁੜੇ ਪ੍ਰਬੰਧਾਂ ਲਈ ਦਿਸ਼ਾ ਨਿਰਦੇਸ਼ ਜਾਰੀ ਕੀਤੇ ਹਨ ਤਾਂ ਜੋ ਕੋਰੋਨਾ ਮਹਾਂਮਾਰੀ ਦੇ ਖਤਮ ਹੋਣ ਤੋਂ ਬਾਅਦ ਰਾਜ ਵਿੱਚ ਚਾਰਧਾਮ ਯਾਤਰਾ ਨੂੰ ਮੁੜ ਪਟੜੀ ‘ਤੇ ਲਿਆਂਦਾ ਜਾ ਸਕੇ । ਦੱਸ ਦੇਈਏ ਕਿ ਚਾਰੋਂ ਧਾਮਾਂ ਦੇ ਸਰਦੀਆਂ ਵਿੱਚ ਭਾਰੀ ਬਰਫਬਾਰੀ ਅਤੇ ਤੇਜ਼ ਠੰਡ ਦੀ ਚਪੇਟ ਵਿੱਚ ਰਹਿਣ ਕਾਰਨ ਉਨ੍ਹਾਂ ਦੇ ਕਪਾਟ ਹਰ ਸਾਲ ਅਕਤੂਬਰ-ਨਵੰਬਰ ਵਿੱਚ ਸ਼ਰਧਾਲੂਆਂ ਲਈ ਬੰਦ ਕਰ ਦਿੱਤੇ ਜਾਂਦੇ ਹਨ, ਜੋ ਅਗਲੇ ਸਾਲ ਅਪ੍ਰੈਲ-ਮਈ ਵਿੱਚ ਦੁਬਾਰਾ ਖੋਲ੍ਹ ਦਿੱਤੇ ਜਾਂਦੇ ਹਨ ।
ਵੁਡ ਸਟੋਨ ਕੰਪਨੀ ਨੇ ਕੇਦਾਰਨਾਥ ਵਿਖੇ ਬਰਫ਼ ਦੇ ਗਲੇਸ਼ੀਅਰਾਂ ਨੂੰ ਕੱਟ ਕੇ ਮੰਦਿਰ ਤੱਕ ਪਹੁੰਚਣ ਲਈ ਰਸਤਾ ਬਣਾਇਆ । ਕੇਦਾਰਨਾਥ ਵਿੱਚ ਅਜੇ ਵੀ 4 ਤੋਂ 6 ਫੁੱਟ ਬਰਫਬਾਰੀ ਦੇਖੀ ਜਾ ਸਕਦੀ ਹੈ. ਕਪਾਟ ਖੁੱਲ੍ਹਣ ਦੌਰਾਨ ਰਿਸ਼ੀਕੇਸ਼ ਦੇ ਬਾਬਾ ਦੇ ਸ਼ਰਧਾਲੂ, ਸਤੀਸ਼ ਕਾਲੜਾ ਨੇ ਕੇਦਾਰਨਾਥ ਮੰਦਿਰ ਨੂੰ 10 ਕੁਇੰਟਲ ਗੇਂਦਾ, ਗੁਲਾਬ ਅਤੇ ਹੋਰ ਫੁੱਲਾਂ ਨਾਲ ਮੰਦਿਰ ਨੂੰ ਸਜਾਇਆ । ਕੇਦਾਰਨਾਥ ਧਾਮ ਦੇ ਕਪਾਟ ਖੁੱਲ੍ਹਣ ਦੇ ਨਾਲ ਹੀ ਉਤਰਾਖੰਡ ਦੇ ਚਾਰਾਂ ਧਰਮਾਂ ਵਿਚੋਂ ਤਿੰਨ ਦੇ ਕਪਾਟ ਖੁੱਲ੍ਹ ਗਏ ਹਨ । ਗੰਗੋਤਰੀ-ਯਮੁਨੋਤਰੀ ਧਾਮ ਦੇ ਕਪਾਟ ਅਕਸ਼ੈ ਤ੍ਰਿਤੀਆ ਦੇ ਮੌਕੇ ‘ਤੇ 26 ਅਪ੍ਰੈਲ ਨੂੰ ਖੁੱਲ੍ਹ ਚੁੱਕੇ ਹਨ, ਜਦਕਿ ਸ਼੍ਰੀ ਬਦਰੀਨਾਥ ਧਾਮ ਦੇ ਦਰਵਾਜ਼ੇ 15 ਮਈ ਨੂੰ ਖੁੱਲ੍ਹਣਗੇ ।
