ਨਵੀਂ ਦਿੱਲੀ- ਤਿਉਹਾਰੀ ਸੀਜ਼ਨ ਦੌਰਾਨ ਘੱਟ ਸਪਲਾਈ ਨੂੰ ਸੁਚਾਰੂ ਬਣਾਉਣ ਲਈ ਸਰਕਾਰ ਵੱਲੋਂ ਚੁੱਕੇ ਜਾ ਰਹੇ ਕਦਮਾਂ ਦੇ ਬਾਵਜੂਦ, ਪਿਛਲੇ ਇੱਕ ਮਹੀਨੇ ਵਿੱਚ ਪ੍ਰਚੂਨ (ਰਿਟੇਲ) ਅਤੇ ਥੋਕ (ਹੋਲਸੇਲ) ਦੋਵਾਂ ਬਾਜ਼ਾਰਾਂ ਵਿੱਚ ਖੰਡ ਦੀਆਂ ਕੀਮਤਾਂ ਵਿੱਚ 4 ਰੁਪਏ ਪ੍ਰਤੀ ਕਿਲੋ ਤੋਂ ਵੱਧ ਦਾ ਵਾਧਾ ਦਰਜ ਕੀਤਾ ਗਿਆ ਹੈ। ਉਪਭੋਗਤਾ ਮਾਮਲਿਆਂ ਦੇ ਮੰਤਰਾਲੇ ਦੇ ਅੰਕੜਿਆਂ ਅਨੁਸਾਰ, ਰੋਜ਼ਾਨਾ ਔਸਤ ਪ੍ਰਚੂਨ ਅਤੇ ਥੋਕ ਕੀਮਤਾਂ ਕ੍ਰਮਵਾਰ 59.50 ਰੁਪਏ ਪ੍ਰਤੀ ਕਿਲੋ ਅਤੇ 55.40 ਰੁਪਏ ਪ੍ਰਤੀ ਕਿਲੋ ਦਰਜ ਕੀਤੀਆਂ ਗਈਆਂ ਹਨ। ਸਾਲਾਨਾ ਆਧਾਰ ’ਤੇ (ਪਿਛਲੇ ਸਾਲ ਦੀ ਤੁਲਨਾ ‘ਚ) ਕੀਮਤਾਂ ’ਚ 12 ਤੋਂ 13 ਰੁਪਏ ਪ੍ਰਤੀ ਕਿਲੋ ਦਾ ਉਛਾਲ ਆਇਆ ਹੈ। ਇੱਕ ਸਾਲ ਪਹਿਲਾਂ, ਪ੍ਰਚੂਨ ਖੰਡ ਦਾ ਭਾਅ 46.50 ਰੁਪਏ ਪ੍ਰਤੀ ਕਿਲੋ ਅਤੇ ਥੋਕ ਭਾਅ 43.23 ਰੁਪਏ ਪ੍ਰਤੀ ਕਿਲੋ ਸੀ।
ਮਹਾਂਨਗਰਾਂ ਵਿੱਚੋਂ ਕੋਲਕਾਤਾ ਵਿੱਚ 3 ਨਵੰਬਰ ਨੂੰ ਸਭ ਤੋਂ ਵੱਧ ਪ੍ਰਚੂਨ ਭਾਅ 65 ਰੁਪਏ ਪ੍ਰਤੀ ਕਿਲੋ ਦਰਜ ਕੀਤਾ ਗਿਆ, ਜੋ ਕਿ ਇੱਕ ਸਾਲ ਪਹਿਲਾਂ 50 ਰੁਪਏ ਸੀ। ਇਸ ਤੋਂ ਬਾਅਦ ਦਿੱਲੀ ਵਿੱਚ 64 ਰੁਪਏ ਪ੍ਰਤੀ ਕਿਲੋ (ਇੱਕ ਸਾਲ ਪਹਿਲਾਂ 46 ਰੁਪਏ) ਅਤੇ ਮੁੰਬਈ ਵਿੱਚ 61 ਰੁਪਏ ਪ੍ਰਤੀ ਕਿਲੋ (ਇੱਕ ਸਾਲ ਪਹਿਲਾਂ 45 ਰੁਪਏ) ਦਰਜ ਕੀਤਾ ਗਿਆ। ਕੀਮਤਾਂ ਵਿੱਚ ਵਾਧੇ ਦਾ ਮੁੱਖ ਕਾਰਨ 2025-26 ਦੇ ਉਤਪਾਦਨ ਦਾ ਪਹਿਲੇ ਅਨੁਮਾਨਾਂ ਨਾਲੋਂ ਘੱਟ ਰਹਿਣਾ ਹੈ। ਤਿਉਹਾਰੀ ਮੰਗ, ਫ਼ਸਲਾਂ ਦੇ ਨੁਕਸਾਨ, ਗਲੋਬਲ ਪੱਧਰ ’ਤੇ ਘੱਟ ਸਪਲਾਈ ਅਤੇ ਜ਼ਖ਼ੀਰਾਖੋਰੀ ਨੇ ਇਸ ਦਬਾਅ ਨੂੰ ਹੋਰ ਵਧਾ ਦਿੱਤਾ ਹੈ।
ਸਰਕਾਰ ਨੇ ਇਸ ਦੇ ਜਵਾਬ ਵਿੱਚ ਸਟਾਕ ਸੀਮਾ ਲਗਾਉਣ, ਦਰਾਮਦ (ਇੰਪੋਰਟ) ਕਰਨ, ਨਿਗਰਾਨੀ ਵਧਾਉਣ ਅਤੇ ਗੰਨੇ ਦੀ ਪਿੜਾਈ (ਕ੍ਰਸ਼ਿੰਗ) ਦਾ ਕੰਮ ਜਲਦੀ ਸ਼ੁਰੂ ਕਰਨ ਵਰਗੇ ਕਦਮ ਚੁੱਕੇ ਹਨ। ‘ਨੈਸ਼ਨਲ ਫੈਡਰੇਸ਼ਨ ਆਫ਼ ਕੋਆਪ੍ਰੇਟਿਵ ਸ਼ੂਗਰ ਫੈਕਟਰੀਜ਼ ਲਿਮਟਿਡ’ (NFCSF) ਨੇ ਸੋਮਵਾਰ ਨੂੰ ਦੱਸਿਆ ਕਿ ਭਾਰਤ ਨੇ 2026-27 ਸੀਜ਼ਨ (ਅਕਤੂਬਰ-ਸਤੰਬਰ) ਦੇ ਪਹਿਲੇ ਮਹੀਨੇ ਵਿੱਚ 8.45 ਲੱਖ ਟਨ ਖੰਡ ਦਾ ਉਤਪਾਦਨ ਕੀਤਾ ਹੈ। ਗੰਨੇ ਦੀ ਪੀੜਾਈ ਦਾ ਸੀਜ਼ਨ 8 ਅਕਤੂਬਰ ਤੋਂ ਸ਼ੁਰੂ ਹੋਇਆ ਸੀ ਅਤੇ 30 ਅਕਤੂਬਰ ਤੱਕ 152 ਮਿੱਲਾਂ ਨੇ ਖੰਡ ਦਾ ਉਤਪਾਦਨ ਕੀਤਾ ਸੀ, ਜਿਸ ਨਾਲ ਚੱਲ ਰਹੇ ਤਿਉਹਾਰੀ ਸੀਜ਼ਨ ਦੌਰਾਨ ਘਰੇਲੂ ਸਪਲਾਈ ਵਿੱਚ ਵਾਧਾ ਹੋਇਆ ਹੈ।