ਵਾਸ਼ਿੰਗਟਨ- ਜਾਪਾਨ ਦੀ ਪ੍ਰਧਾਨ ਮੰਤਰੀ ਸਾਨੇ ਤਾਕਾਇਚੀ ਨੇ ਵ੍ਹਾਈਟ ਹਾਊਸ ਵਿਖੇ ਰਾਸ਼ਟਰਪਤੀ ਡੋਨਲਡ ਟਰੰਪ ਨਾਲ ਮੁਲਾਕਾਤ ਕਰਕੇ ਦੋਵਾਂ ਦੇਸ਼ਾਂ ਦੇ ਗਠਜੋੜ ਨੂੰ ਮੁੜ ਸੁਰਜੀਤ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ। ਇਹ ਮੁਲਾਕਾਤ ਅਜਿਹੇ ਸਮੇਂ ਹੋਈ ਹੈ ਜਦੋਂ ਟਰੰਪ ਨੇ ਸ਼ਿਕਾਇਤ ਕੀਤੀ ਸੀ ਕਿ ਜਾਪਾਨ ਵਰਗੇ ਸਹਿਯੋਗੀ ਦੇਸ਼ ਹੋਰਮੁਜ਼ ਜਲਮਾਰਗ(Strait of Hormuz) ਦੀ ਸੁਰੱਖਿਆ ਲਈ ਅਮਰੀਕਾ ਦੇ ਸੱਦੇ ‘ਤੇ ਤੇਜ਼ੀ ਨਾਲ ਅੱਗੇ ਨਹੀਂ ਆਏ।
ਤਾਕਾਇਚੀ ਨੇ ਟਰੰਪ ਨੂੰ ਵਿਸ਼ਵ ਸ਼ਾਂਤੀ ਦੇ ਰਾਹ ਦਸੇਰਾ ਵਜੋਂ ਪੇਸ਼ ਕਰਦਿਆਂ ਕਿਹਾ ਕਿ ਮੌਜੂਦਾ ਗੰਭੀਰ ਸੁਰੱਖਿਆ ਮਾਹੌਲ ਵਿੱਚ ਸਿਰਫ ਉਹ ਹੀ ਵਿਸ਼ਵ ਸ਼ਾਂਤੀ ਸਥਾਪਿਤ ਕਰ ਸਕਦੇ ਹਨ। ਮੁਲਾਕਾਤ ਦੌਰਾਨ ਉਦੋਂ ਕੁਝ ਤਣਾਅ ਦੇਖਣ ਨੂੰ ਮਿਲਿਆ ਜਦੋਂ ਟਰੰਪ ਨੇ 1941 ਦੇ ‘ਪਰਲ ਹਾਰਬਰ’ ਹਮਲੇ ਦਾ ਜ਼ਿਕਰ ਕਰਦਿਆਂ ਮਜ਼ਾਕੀਆ ਲਹਿਜੇ ਵਿੱਚ ਕਿਹਾ ਕਿ ਜਿਵੇਂ ਜਾਪਾਨ ਨੇ ਉਸ ਵੇਲੇ ਅਮਰੀਕਾ ਨੂੰ ਦੱਸੇ ਬਿਨਾਂ ਹਮਲਾ ਕੀਤਾ ਸੀ, ਉਵੇਂ ਹੀ ਅਮਰੀਕਾ ਨੇ ਵੀ ਇਰਾਨ ‘ਤੇ ਹਮਲੇ ਤੋਂ ਪਹਿਲਾਂ ਸਹਿਯੋਗੀਆਂ ਨੂੰ ਸੂਚਿਤ ਨਹੀਂ ਕੀਤਾ। ਹਾਲਾਂਕਿ, ਸ਼ਾਮ ਦੇ ਰਾਤਰੀ ਭੋਜਨ ਦੌਰਾਨ ਦੋਵਾਂ ਆਗੂਆਂ ਨੇ ਇੱਕ-ਦੂਜੇ ਦੀ ਖੂਬ ਪ੍ਰਸ਼ੰਸਾ ਕੀਤੀ ਅਤੇ ਤਾਕਾਇਚੀ ਨੇ ਅੰਗਰੇਜ਼ੀ ਵਿੱਚ ਐਲਾਨ ਕੀਤਾ ਕਿ “ਜਾਪਾਨ ਵਾਪਸ ਆ ਗਿਆ ਹੈ।”
ਦੋਵਾਂ ਦੇਸ਼ਾਂ ਨੇ ਇਸ ਮੌਕੇ 40 ਬਿਲੀਅਨ ਅਮਰੀਕੀ ਡਾਲਰ ਦੇ ਇੱਕ ਵੱਡੇ ਪ੍ਰਮਾਣੂ ਰਿਐਕਟਰ ਸਮਝੌਤੇ ‘ਤੇ ਹਸਤਾਖਰ ਕੀਤੇ ਹਨ। ਇਸ ਸਮਝੌਤੇ ਤਹਿਤ ਅਮਰੀਕਾ ਦੀ ਜੀਈ ਵਰਨੋਵਾ (GE Vernova Inc.) ਅਤੇ ਜਾਪਾਨ ਦੀ ਹਿਟਾਚੀ (Hitachi Ltd.) ਮਿਲ ਕੇ ਅਮਰੀਕਾ ਦੇ ਟੈਨਸੀ ਅਤੇ ਅਲਾਬਾਮਾ ਰਾਜਾਂ ਵਿੱਚ ਉੱਨਤ ‘ਸਮਾਲ ਮਾਡਿਊਲਰ ਰਿਐਕਟਰ’ (Small Modular Reactors) ਤਿਆਰ ਕਰਨਗੀਆਂ, ਜਿਸ ਨਾਲ ਬਿਜਲੀ ਦੀਆਂ ਕੀਮਤਾਂ ਨੂੰ ਸਥਿਰ ਕਰਨ ਅਤੇ ਪਾਵਰ ਜਨਰੇਸ਼ਨ ਵਧਾਉਣ ਵਿੱਚ ਮਦਦ ਮਿਲੇਗੀ। ਇਰਾਨ ਨਾਲ ਚੱਲ ਰਹੀ ਜੰਗ ਕਾਰਨ ਟਰੰਪ ਦਾ ਚੀਨ ਦੌਰਾ ਫਿਲਹਾਲ ਮੁਲਤਵੀ ਕਰ ਦਿੱਤਾ ਗਿਆ ਹੈ ਅਤੇ ਉਹਨਾਂ ਨੇ ਸਪੱਸ਼ਟ ਕੀਤਾ ਕਿ ਜਾਪਾਨ ਆਪਣੀ ਤੇਲ ਸਪਲਾਈ ਲਈ ਹੋਰਮੁਜ਼ ਜਲਡਮਰੂਮੱਧ ‘ਤੇ ਨਿਰਭਰ ਹੈ, ਇਸ ਲਈ ਉਸ ਨੂੰ ਇਸ ਦੀ ਸੁਰੱਖਿਆ ਵਿੱਚ ਵੱਡੀ ਭੂਮਿਕਾ ਨਿਭਾਉਣੀ ਚਾਹੀਦੀ ਹੈ।