ਸਾਊਦੀ ਅਰਬ ਦੇ ਪ੍ਰਿੰਸ ਸਲਮਾਨ ‘ਤੇ ਸਾਬਕਾ ਸਾਊਦੀ ਖੁਫੀਆ ਅਧਿਕਾਰੀ ਨੂੰ ਮਰਵਾਉਣ ਲਈ ਕੈਨੇਡਾ ‘ਚ ਆਪਣੇ ਬੰਦੇ ਭੇਜਣ ਦੇ ਇਲਜ਼ਾਮ ਲੱਗੇ ਹਨ। ਅਮਰੀਕਾ ਦੀ ਅਦਾਲਤ ‘ਚ ਦਾਇਰ ਸ਼ਿਕਾਇਤ ‘ਚ ਇਲਜ਼ਾਮ ਲਾਇਆ ਗਿਆ ਕਿ ਡਾ. ਸਾਦ ਅਲ-ਜਾਬਰੀ ਨੂੰ ਮਾਰਨ ਦੀ ਇਹ ਸਾਜ਼ਿਸ਼ ਪੱਤਰਕਾਰ ਜ਼ਮਾਲ ਖਾਸ਼ੋਜੀ ਦੀ ਹੱਤਿਆ ਤੋਂ ਬਾਅਦ ਕੀਤੀ ਗਈ ਸੀ। ਇਸ ਤੋਂ ਪਹਿਲਾਂ ਪ੍ਰਿੰਸ ਸਲਮਾਨ ‘ਤੇ ਜਮਾਲ ਖਾਸ਼ੋਜੀ ਦੀ ਹੱਤਿਆ ਦੇ ਵੀ ਇਲਜ਼ਾਮ ਲੱਗੇ ਸਨ।
ਸਾਊਦੀ ਅਰਬ ਦੇ ਇਕ ਸੀਨੀਅਰ ਅਧਿਕਾਰੀ ਰਹੇ ਸਾਦ ਅਲ ਜਾਬਰੀ ਤਿੰਨ ਸਾਲ ਪਹਿਲਾਂ ਕੈਨੇਡਾ ਚਲੇ ਗਏ ਸਨ ਤੇ ਉਸ ਤੋਂ ਬਾਅਦ ਉਹ ਟੋਰਾਂਟੋ ‘ਚ ਹੀ ਰਹਿ ਰਹੇ ਹਨ। ਵਾਸ਼ਿਗਟਨ ਡੀਸੀ ‘ਚ ਦਾਇਰ 106 ਸਫ਼ਿਆਂ ਦੇ ਸ਼ਿਕਾਇਤਨਾਮੇ ‘ਚ ਕਿਹਾ ਗਿਆ ਕਿ ਪ੍ਰਿੰਸ ਸਲਮਾਨ ਜਾਬਰੀ ਨੂੰ ਚੁੱਪ ਕਰਵਾਉਣ ਲਈ ਮਰਵਾਉਣਾ ਚਾਹੁੰਦੇ ਸਨ।
ਇਹ ਸਾਜ਼ਿਸ਼ ਅਸਫਲ ਰਹੀ ਕਿਉਂਕਿ ਟੋਰਾਂਟੋ ਦੇ ਪੀਅਰਸਨ ਇੰਟਰਨੈਸ਼ਨਲ ਏਅਰਪੋਰਟ ‘ਤੇ ਜਾਂਚ ਅਧਿਕਾਰੀਆਂ ਨੂੰ ਕੈਨੇਡਾ ਜਾਣ ਵਾਲੇ ਹਿੱਟ ਸਕੁਐਡ ਦੇ ਲੋਕਾਂ ‘ਤੇ ਸ਼ੱਕ ਹੋਇਆ। ਇਸੇ ਕਾਰਨ ਇਹ ਯੋਜਨਾ ਸਿਰੇ ਨਾ ਚੜ ਸਕੀ।
61 ਸਾਲਾ ਜਾਬਰੀ ਕਈ ਸਾਲ ਬ੍ਰਿਟੇਨ ਦੀ MI6 ਤੇ ਸਾਊਦੀ ਅਰਬ ‘ਚ ਪੱਛਮੀ ਦੇਸ਼ਾਂ ਦੀਆਂ ਕਈ ਜਾਸੂਸੀ ਏਜੰਸੀਆਂ ਦੇ ਮਹੱਤਵਪੂਰਨ ਮਦਦਗਾਰ ਰਹੇ ਸਨ।