Isro launch PSLV-C48: ਇਸਰੋ ਦਾ PSLV ਰਾਕੇਟ ਬੁੱਧਵਾਰ ਯਾਨੀ ਕਿ ਅੱਜ ਆਪਣੇ 50ਵੇਂ ਮਿਸ਼ਨ ’ਤੇ ਜਾਣ ਵਾਲਾ ਹੈ । PSLV C-48 ਰਾਕੇਟ ਨੂੰ ਦੁਪਹਿਰ 3:25 ਵਜੇ ਦੇ ਕਰੀਬ ਇੱਕ ਤਾਕਤਵਰ ਇਮੇਜਿੰਗ ਸੈਟੇਲਾਇਟ ਰੀਸੈਟ–2ਬੀਆਰ1 ਅਤੇ 9 ਵਿਦੇਸ਼ੀ ਸੈਟੇਲਾਇਟਸ ਸਮੇਤ ਆਂਧਰਾ ਪ੍ਰਦੇਸ਼ ਦੇ ਸ਼੍ਰੀਹਰੀਕੋਟਾ ਸਥਿਤ ਸਤੀਸ਼ ਧਵਨ ਪੁਲਾੜ ਕੇਂਦਰ ਤੋਂ ਲਾਂਚ ਕੀਤਾ ਜਾਵੇਗਾ ।
ਦਰਅਸਲ, ਇਹ ਇਮੇਜਿੰਗ ਸੈਟੇਲਾਇਟ ਭਾਰਤੀ ਸਰਹੱਦਾਂ ਦੀ ਨਿਗਰਾਨੀ ਵਿੱਚ ਫ਼ੌਜ ਲਈ ਮਦਦਗਾਰ ਸਿੱਧ ਹੋ ਸਕਦਾ ਹੈ । ਇਸਰੋ ਦਾ RiSAT-2BR1 ਤਾਕਤਵਰ ਨਿਗਰਾਨੀ ਕੈਮਰਾ ਸੈਟੇਲਾਇਟ ਹੈ ਜੋ ਬੱਦਲਾਂ ਦੇ ਬਾਵਜੂਦ ਵੀ ਹਾਈ ਰੈਜ਼ੋਲਿਯੂਸ਼ਨ ਵਾਲੀਆਂ ਸਾਫ਼ ਤਸਵੀਰਾਂ ਲੈ ਸਕਦਾ ਹੈ । ਇਹ ਇਮੇਜਿੰਗ ਸੈਟੇਲਾਇਟ ਐਕਸ–ਬੈਂਡ ਸਿੰਥੈਟਿਕ ਐਪਰਚਰ ਰਾਡਾਰ ਨਾਲ ਲੈਸ ਜੋ ਰੱਖਿਆ ਵਰਤੋਂ ਲਈ ਸਭ ਤੋਂ ਵਧੀਆ ਹੈ ।
ਜ਼ਿਕਰਯੋਗ ਹੈ ਕਿ ਇਹ ਸੈਟੇਲਾਇਟ ਦਿਨ ਤੇ ਰਾਤ ਦੇ ਨਾਲ ਹੀ ਹਰੇਕ ਮੌਸਮ ਵਿੱਚ ਪ੍ਰਭਾਵਸ਼ਾਲੀ ਢੰਗ ਨਾਲ ਕੰਮ ਕਰ ਸਕਦਾ ਹੈ । ਇਹ ਰਾਕੇਟ ਸਾਰੇ ਸੈਟੇਲਾਇਟਸ ਨੂੰ 576 ਕਿਲੋਮੀਟਰ ‘ਤੇ ਪੁਲਾੜ ਦੇ ਪੰਧ ਵਿੱਚ ਸਥਾਪਤ ਕਰੇਗਾ । RiSAT-2BR1 ਇਸਰੋ ਵੱਲੋਂ ਤਿਆਰ ਇੱਕ ਰਾਡਾਰ ਇਮੇਜਿੰਗ ਭਾਵ ਆਬਜ਼ਰਵੇਸ਼ਨ ਸੈਟੇਲਾਇਟ ਹੈ । ਜਿਸ ਦਾ ਵਜ਼ਨ 628 ਕਿਲੋਗ੍ਰਾਮ ਹੈ ਤੇ ਇਸ ਸੈਟੇਲਾਇਟ ਦੀ ਮਿਸ਼ਨ-ਮਿਆਦ 5 ਸਾਲ ਹੋਵੇਗੀ ।
ਦੱਸ ਦੇਈਏ ਕਿ ਇਨ੍ਹਾਂ ਵਿੱਚ ਇਜ਼ਰਾਇਲ, ਇਟਲੀ ਜਾਪਾਨ ਦਾ ਇੱਕ-ਇੱਕ ਅਤੇ ਅਮਰੀਕਾ ਦੇ ਛੇ ਸੈਟੇਲਾਇਟ ਸ਼ਾਮਿਲ ਹੋਣਗੇ । ਬੁੱਧਵਾਰ ਨੂੰ ਲਾਂਚ ਹੋਣ ਵਾਲੇ PSLV-C48 ਰਾਕੇਟ ਦੀ ਸਫ਼ਲਤਾ ਲਈ ਇਸਰੋ ਮੁਖੀ ਕੇ. ਸ਼ਿਵਨ ਮੰਗਲਵਾਰ ਨੂੰ ਤਿਰੂਪਤੀ ਬਾਲਾਜੀ ਪਹੁੰਚੇ । ਜਿੱਥੇ ਉਨ੍ਹਾਂ ਨੇ ਪੂਜਾ ਕੀਤੀ ਤੇ ਮਿਸ਼ਨ ਦੀ ਸਫ਼ਲਤਾ ਲਈ ਅਰਦਾਸ ਕੀਤੀ ।