ਧਮਾਕੇਦਾਰ ਡਾਂਸ ਨੰਬਰਾਂ ਕਾਰਨ ਤਮੰਨਾ ਭਾਟੀਆ ਨੌਜਵਾਨਾਂ ਤੇ ਇੰਟਰਨੈੱਟ ਮੀਡੀਆ ’ਤੇ ਕਰ ਰਹੀ ਹੈ ਰਾਜ, ਪੜ੍ਹੋ ਕਿਸ ਰਣਨੀਤੀ ਨਾਲ ਅੱਗੇ ਵਧ ਰਹੀ ਅੱਗੇ

ਡਿਜੀਟਲ ’ਤੇ ਜ਼ਿਆਦਾ ਮੁਕਾਬਲਾ-ਟਿਕਟ ਵਿੰਡੋ ‘ਤੇ ਕਮਾਈ ਦੇ ਅੰਕੜਿਆਂ ਦੇ ਦਬਾਅ ਤੋਂ ਮੁਕਤ ਡਿਜੀਟਲ ਪਲੇਟਫਾਰਮ ਦੇ ਮੁਕਾਬਲੇ ਬਾਰੇ ਤਮੰਨਾ ਕਹਿੰਦੀ ਹੈ, ‘ਅਜਿਹਾ ਨਹੀਂ ਕਿ ਡਿਜੀਟਲ ਪਲੇਟਫਾਰਮ ‘ਤੇ ਮੁਕਾਬਲਾ ਨਹੀਂ ਹੈ, ਮੈਨੂੰ ਤਾਂ ਲਗਦਾ ਹੈ ਕਿ ਇੱਥੇ ਜ਼ਿਆਦਾ ਮੁਕਾਬਲਾ ਹੈ। ਇੱਥੇ ਤੁਹਾਡਾ ਮੁਕਾਬਲਾ ਸਿਰਫ਼ ਮੌਜੂਦਾ ਫਿਲਮਾਂ ਨਾਲ ਨਹੀਂ ਹੁੰਦਾ, ਦਸ, ਵੀਹ ਜਾਂ ਪੰਜਾਹ ਸਾਲ ਪੁਰਾਣੀਆਂ ਫਿਲਮਾਂ ਨਾਲ ਵੀ ਹੁੰਦਾ ਹੈ, ਦਰਸ਼ਕਾਂ ਸਾਹਮਣੇ ਉਹ ਵੀ ਬਦਲ ਹੁੰਦੇ ਹਨ। ਇਸ ਦੇ ਨਾਲ ਹੀ ਕੰਟੈਂਟ ਦਾ ਪੱਧਰ ਵੀ ਵਿਸ਼ਵ ਪੱਧਰੀ ਹੋਣਾ ਚਾਹੀਦਾ, ਕਿਉਂਕਿ ਉੱਥੇ ਦੁਨੀਆ ਭਰ ਦੇ ਕੰਟੈਂਟ ਉਪਲਬਧ ਹਨ। ਤੁਹਾਡਾ ਕੰਟੈਂਟ ਵੀ ਵਿਦੇਸ਼ ਜਾਂਦਾ ਹੈ। ਡਿਜੀਟਲ ਪਲੇਟਫਾਰਮ ‘ਤੇ ਬੇਸ਼ੱਕ ਕਮਾਈ ਦੇ ਅੰਕੜੇ ਨਾ ਆਉਂਦੇ ਹੋਣ, ਪਰ ਉਨ੍ਹਾਂ ਦੇ ਵੀ ਕਈ ਅੰਦਰੂਨੀ ਅੰਕੜੇ ਹੁੰਦੇ ਹਨ। ਉਨ੍ਹਾਂ ਅੰਕੜਿਆਂ ਨੂੰ ਮੱਦੇਨਜ਼ਰ ਰੱਖ ਕੇ ਹੀ ਉਹ ਆਪਣੇ ਪ੍ਰੋਜੈਕਟਸ ਦਾ ਨਿਰਮਾਣ ਕਰਦੇ ਹਨ। ਉਹ ਅੰਕੜੇ ਬੇਸ਼ੱਕ ਦਰਸ਼ਕਾਂ ਦੇ ਸਾਹਮਣੇ ਨਹੀਂ ਆਉਂਦੇ ਪਰ ਪ੍ਰੋਡਿਊਸਰਜ਼ ਨੂੰ ਪਤਾ ਚੱਲ ਜਾਂਦਾ ਹੈ!’

ਵਧੀਆ ਬੀਤਿਆ ਬਚਪਨ-ਆਪਣੀ ਜ਼ਿੰਦਗੀ ਦੀ ਡਾਇਰੀ ਤੇ ਉਸ ਦੇ ਮਹੱਤਵਪੂਰਨ ਚੈਪਟਰ ਬਾਰੇ ਤਮੰਨਾ ਕਹਿੰਦੀ ਹੈ, ‘ਮੈਨੂੰ ਆਪਣਾ ਬਚਪਨ ਬਹੁਤ ਪਿਆਰਾ ਹੈ। ਮੈਂ ਬਚਪਨ ਵਿਚ ਬਹੁਤ ਮਜ਼ੇ ਕੀਤੇ ਹਨ। ਆਪਣੀ ਜ਼ਿੰਦਗੀ ਦੀ ਡਾਇਰੀ ‘ਚ ਯਕੀਨੀ ਤੌਰ ‘ਤੇ ਸਭ ਤੋਂ ਵੱਡਾ ਅਧਿਆਏ ਬਚਪਨ ਦਾ ਹੀ ਰੱਖਾਂਗੀ। ਮੇਰੇ ਮਾਤਾ-ਪਿਤਾ ਖੁਸ਼ਮਿਜ਼ਾਜ ਹਨ। ਮੇਰੇ ਉੱਪਰ ਕੋਈ ਵੀ ਪਾਬੰਦੀ ਨਹੀਂ ਸੀ। ਅਸੀਂ ਜੋ ਚਾਹੁੰਦੇ ਸੀ, ਸਾਨੂੰ ਕਰਨ ਦਿੱਤਾ ਜਾਂਦਾ ਸੀ। ਜਿਵੇਂ ਕਦੀ-ਕਦਾਈਂ ਅਸੀਂ ਸਕੂਲ ਨਾ ਜਾ ਕੇ, ਫਿਲਮ ਦੇਖਣ ਜਾਣਾ ਹੁੰਦਾ ਸੀ ਤਾਂ ਸਾਨੂੰ ਅਜਿਹਾ ਕਰਨ ਦਿੰਦੇ ਸਨ। ਅਸੀਂ ਲੋਕ ਸਕੂਲ ‘ਚ ਛੇ-ਸੱਤ ਸਮੋਸੇ ਤਾਂ ਉਂਝ ਹੀ ਖਾ ਜਾਂਦੇ ਸੀ। ਕੋਈ ਚੀਜ਼ ਨਾਪਤੋਲ ਕੇ ਨਹੀਂ ਕਰਦੇ ਸੀ। ਨਾ ਰੋਟੀਆਂ ਗਿਣ ਕੇ ਖਾਂਦੇ ਸੀ ਤੇ ਨਾ ਹੀ ਵਕਤ ਗਿਣਦੇ ਸੀ। ਅਜਿਹੀ ਆਜ਼ਾਦੀ ਦਾ ਆਨੰਦ ਅਸੀਂ ਸਿਰਫ਼ ਉਸੇ ਉਮਰ ‘ਚ ਲੈ ਸਕਦੇ ਹਾਂ। ਬਚਪਨ ਵਿਚ ਮੈਨੂੰ ਇੰਨੀ ਜ਼ਿਆਦਾ ਆਜ਼ਾਦੀ ਮਿਲੀ ਸੀ ਕਿ ਵੱਡੀ ਹੋਣ ਤੋਂ ਬਾਅਦ ਮੈਂ ਕੁਝ ਜ਼ਿਆਦਾ ਹੀ ਜ਼ਿੰਮੇਵਾਰ ਹੋ ਗਈ।’

ਦਰਸ਼ਕਾਂ ਦੀ ਪ੍ਰਤੀਕਿਰਿਆ ਜ਼ਰੂਰੀ-ਆਪਣੇ ਪ੍ਰੋਜੈਕਟ ਲਈ ਲੋਕਾਂ ਤੋਂ ਮਿਲਣ ਵਾਲੀ ਪ੍ਰਤੀਕਿਰਿਆ ਵੱਲ ਧਿਆਨ ਦੇਣ ਦੀ ਗੱਲ ‘ਤੇ ਤਮੰਨਾ ਕਹਿੰਦੀ ਹੈ, ‘ਮੈਂ ਕਦੀ ਕਿਸੇ ਤੋਂ ਇਹ ਨਹੀਂ ਪੁੱਛਦੀ ਕਿ ਫਿਲਮ ਕਿਵੇਂ ਦੀ ਚੱਲ ਰਹੀ ਹੈ। ਜੇਕਰ ਕਿਸੇ ਨੂੰ ਇਹ ਗੱਲ ਪੁੱਛਣੀ ਪੈ ਰਹੀ ਹੈ ਤਾਂ ਇਹ ਚੰਗਾ ਨਹੀਂ। ਅਜਿਹੇ ਵਿਅਕਤੀ, ਜੋ ਸਾਡੇ ਕੰਮ ਦੇ ਦਾਇਰੇ ‘ਚ ਨਾ ਹੋਣ, ਜੋ ਸਾਡੀ ਇੰਡਸਟਰੀ ਤੋਂ ਨਾ ਹੋਣ, ਅਜਿਹੇ ਲੋਕ ਜੇਕਰ ਮੇਰੇ ਪ੍ਰੋਜੈਕਟਸ ਨੂੰ ਚੰਗਾ ਬੋਲਦੇ ਹਨ ਤਾਂ ਉਸ ਨੂੰ ਚੰਗਾ ਮੰਨਦੀ ਹਾਂ ਤੇ ਬੁਰਾ ਬੋਲੇ ਤਾਂ ਬੁਰਾ ਮੰਨਦੀ ਹਾਂ। ਮੇਰੇ ਲਈ ਉਨ੍ਹਾਂ ਦਰਸ਼ਕਾਂ ਦੇ ਸੁਝਾਅ ਜਾਣਨਾ ਜ਼ਰੂਰੀ ਹੈ।’

ਮਿਲ ਰਿਹਾ ਹੈ ਪਿਆਰ-ਕਾਵਾਲਾ… ਅਤੇ ਆਜ ਕੀ ਰਾਤ… ਗਾਣੇ ਹਿੱਟ ਹੋਣ ਨਾਲ, ਇਨ੍ਹਾਂ ਗਾਣਿਆਂ ‘ਤੇ ਨੌਜਵਾਨਾਂ ਨੇ ਖ਼ੂਬ ਰੀਲਸ ਤੇ ਸ਼ਾਰਟਸ ਵੀ ਬਣਾਏ। ਇਸ ਬਾਰੇ ਤਮੰਨਾ ਕਹਿੰਦੀ ਹੈ, ‘ਕੋਰੋਨਾ ਤੋਂ ਬਾਅਦ ਵਾਇਰਲ ਹੋਣ ਵਾਲੀ ਚੀਜ਼ ਮੈਂ ਹੀ ਹਾਂ (ਸਿਰ ਥੱਲੇ ਕਰ ਕੇ ਜ਼ੋਰ ਨਾਲ ਹੱਸਦੀ ਹੈ)। ਇੰਨਾ ਪਿਆਰ ਮਿਲਣਾ ਬਹੁਤ ਹੀ ਖ਼ੂਬਸੂਰਤ ਅਹਿਸਾਸ ਹੈ। ਰੀਲਸ ਜਾਂ ਸ਼ਾਰਟਸ ਅਜਿਹੀਆਂ ਚੀਜ਼ਾਂ ਹਨ ਜਿਨ੍ਹਾਂ ਨੂੰ ਲੋਕ ਆਪਣੇ ਦੋਸਤਾਂ ਜਾਂ ਪਰਿਵਾਰ ਨਾਲ ਮਜ਼ਾਕ-ਮਸਤੀ ‘ਚ ਦੇਖਦੇ ਤੇ ਬਣਾਉਂਦੇ ਹਨ। ਇਹ ਇਕੱਠੇ ਮਿਲ ਕੇ ਕਰਨ ਵਾਲੀ ਇਕ ਐਕਟੀਵਿਟੀ ਦੀ ਤਰ੍ਹਾਂ ਹੈ। ਅਸੀਂ ਇਨਸਾਨ ਹਾਂ, ਜਦੋਂ ਇਸ ਤਰ੍ਹਾਂ ਇਕੱਠੇ ਇੰਨਾ ਪਿਆਰ ਮਿਲਦਾ ਹੈ ਤਾਂ ਬੁਹਤ ਖੁਸ਼ੀ ਮਿਲਦੀ ਹੈ।’