ਪਾਕਿਸਤਾਨ ਦੇ ਇਸ ਦਾਅਵੇ ਦੇ ਉਲਟ ਕਿ ਉਨ੍ਹਾਂ ਲੋਕਾਂ ਦੇ ਅਫਗਾਨਿਸਤਾਨ ’ਚ ਐਕਟਿਵ ਅੱਤਵਾਦੀ ਸਮੂਹਾਂ ਨਾਲ ਕੋਈ ਰਿਸ਼ਤਾ ਨਹੀਂ ਹੈ, ਕਰੀਬ 24 ਪਾਕਿਤਾਨੀ ਔਰਤਾਂ ਆਪਣੇ ਬੱਚਿਆਂ ਦੇ ਨਾਲ ਉੱਥੇ ਦੀਆਂ ਜੇਲ੍ਹਾਂ ’ਚ ਬੰਦ ਹਨ। ਇਸਲਾਮਿਕ ਸਟੇਟ ਦੇ ਕਥਿਤ ਸਥਾਨਕ ਸੰਗਠਨ ਆਈਐੱਸ-ਖੋਰਾਸਨ ਦੇ ਨਾਲ ਰਿਸ਼ਤੇ ਕਾਰਨ ਔਰਤਾਂ ਨੂੰ ਹਿਰਾਸਤ ’ਚ ਲਿਆ ਗਿਆ ਹੈ। ਪਾਕਿਸਤਾਨ ਸਰਕਾਰ ਦੇ ਇਕ ਅੰਦਰੂਨੀ ਦਸਤਾਵੇਜ ਤੋਂ ਇਹ ਜਾਣਕਾਰੀ ਸਾਹਮਣੇ ਆਈ ਹੈ।
ਦੱਖਣੀ ਏਸ਼ੀਆ ਪ੍ਰੈੱਸ ਮੁਤਾਬਕ, ਅਫਗਾਨਿਸਤਾਨ ’ਚ ਪਾਕਿਸਤਾਨ ਦੇ ਦੂਤਾਵਾਸ ਨੇ ਦੇਸ਼ ਦੇ ਵਿਦੇਸ਼ ਮੰਤਰਾਲੇ ਨੂੰ ਚਿੱਠੀ ਲਿਖ ਕੇ ਇਹ ਦੇਖਣ ਲਈ ਕਿਹਾ ਕਿ ਕਿਵੇਂ ਪਾਕਿਸਤਾਨੀ ਔਰਤਾਂ ਅੱਤਵਾਦੀ ਸਰਗਰਮੀਆਂ ਦੇ ਵੱਖ-ਵੱਖ ਹਿੱਸਿਆਂ ’ਚ ਹਿਰਾਸਤ ’ਚ ਲਈਆਂ ਗਈਆਂ ਹਨ। ਪਿਛਲੇ ਮਹੀਨੇ ਪਾਕਿਸਤਾਨੀ ਅਧਿਕਾਰੀਆਂ ਨੇ ਕਾਬੁਲ ’ਚ ਪੁਲ-ਏ-ਚਾਰਖੀ ਜੇਲ੍ਹ ਦਾ ਦੌਰਾ ਕੀਤਾ ਸੀ। ਇਸ ਜੇਲ੍ਹ ’ਚ ਪਾਕਿਸਤਾਨੀ ਔਰਤਾਂ ਆਪਣੇ ਬੱਚਿਆਂ ਨਾਲ ਬੰਦ ਹਨ।
ਦੱਖਣੀ ਏਸ਼ੀਆ ਪ੍ਰੈੱਸ ਦੀ ਰਿਪੋਰਟ ’ਚ ਕਿਹਾ ਗਿਆ, ‘ਇਹ ਸਾਰੀਆਂ ਔਰਤਾਂ ਤੇ ਉਨ੍ਹਾਂ ਦੇ ਬੱਚੇ ਦਾਸ਼ ਨਾਲ ਸਬੰਧਤ ਕੈਦੀ ਹਨ। ਬਿਆਨ ’ਚ ਉਨ੍ਹਾਂ ਦੇ ਨਾਂ ਤੇ ਪਾਕਿਸਤਾਨ ’ਚ ਉਨ੍ਹਾਂ ਦੇ ਘਰ ਦੇ ਪਤੇ ਦੀ ਵੀ ਜਾਣਕਾਰੀ ਮਿਲਦੀ ਹੈ।’
ਇਹ ਰਿਪੋਰਟ ਪਾਕਿਸਤਾਨ ਸਰਕਾਰ ਦੇ ਦਾਅਵੇ ਦਾ ਖੰਡਨ ਕਰਦੀ ਹੈ। ਪਾਕਿਸਤਾਨ ਸਰਕਾਰ ਦਾ ਦਾਅਵਾ ਹੈ ਕਿ ਇਸਲਾਮਿਕ ਸਟੇਟ ਦੇਸ਼ ’ਚ ਐਕਟਿਵ ਨਹੀਂ ਹੈ ਤੇ ਸਰਕਾਰ ਲੋਕਾਂ ਨੂੰ ਅੱਤਵਾਦੀ ਸਮੂਹਾਂ ’ਚ ਸ਼ਾਮਲ ਹੋਣ ਦੇ ਲਈ ਸਰਹੱਦ ਪਾਰ ਕਰ ਕੇ ਅਫਗਾਨਿਸਤਾਨ ਜਾਣ ਦੀ ਆਗਿਆ ਨਹੀਂ ਦਿੱਤੀ ਹੈ।
